dil ke liye hayat ka paigham ban gain

dil ke liye hayāt kā paiġhām ban ga.iiñ

be-tābiyāñ simaT ke tirā naam ban ga.iiñ

kuchh laġhzishoñ se kaam jahāñ ke sañvar ga.e

kuchh jur.ateñ hayāt par ilzām ban ga.iiñ

har-chand vo nigāheñ hamāre liye na thiiñ

phir bhī harīf-e-gardish-e-ayyām ban ga.iiñ

aane lagā hayāt ko anjām kā ḳhayāl

jab ārzūeñ phail ke ik daam ban ga.iiñ

kuchh kam nahīñ jahāñ se jahāñ kī masarrateñ

jab paas aa.iiñ dushman-e-ārām ban ga.iiñ

'bāqī' jahāñ karegā mirī mai-kashī pe rashk

un kī hasīñ nigāheñ agar jaam ban ga.iiñ

dil ke liye hayat ka paigham ban gain

be-tabiyan simaT ke tera nam ban gain

kuchh laghzishon se kaam jahan ke sanwar gae

kuchh juraten hayat par ilzam ban gain

har-chand wo nigahen hamare liye na thin

phir bhi harif-e-gardish-e-ayyam ban gain

aane laga hayat ko anjam ka KHayal

jab aarzuen phail ke ek dam ban gain

kuchh kam nahin jahan se jahan ki masarraten

jab pas aain dushman-e-aram ban gain

'baqi' jahan karega meri mai-kashi pe rashk

un ki hasin nigahen agar jam ban gain