dil ki chaukhaT pe jo ek dip jala rakkha hai

dil kī chaukhaT pe jo ik diip jalā rakkhā hai

tere lauT aane kā imkān sajā rakkhā hai

saañs tak bhī nahīñ lete haiñ tujhe sochte vaqt

ham ne is kaam ko bhī kal pe uThā rakkhā hai

ruuTh jaate ho to kuchh aur hasīñ lagte ho

ham ne ye soch ke hī tum ko ḳhafā rakkhā hai

tum jise rotā huā chhoḌ ga.e the ik din

ham ne us shaam ko siine se lagā rakkhā hai

chain lene nahīñ detā ye kisī taur mujhe

terī yādoñ ne jo tūfān uThā rakkhā hai

jaane vaale ne kahā thā ki vo lauTegā zarūr

ik isī aas pe darvāza khulā rakkhā hai

tere jaane se jo ik dhuul uThī thī ġham kī

ham ne us dhuul ko āñkhoñ meñ basā rakkhā hai

mujh ko kal shaam se vo yaad bahut aane lagā

dil ne muddat se jo ik shaḳhs bhulā rakkhā hai

āḳhirī baar jo aayā thā mire naam 'vasī'

maiñ ne us ḳhat ko kaleje se lagā rakkhā hai

dil ki chaukhaT pe jo ek dip jala rakkha hai

tere lauT aane ka imkan saja rakkha hai

sans tak bhi nahin lete hain tujhe sochte waqt

hum ne is kaam ko bhi kal pe uTha rakkha hai

ruTh jate ho to kuchh aur hasin lagte ho

hum ne ye soch ke hi tum ko KHafa rakkha hai

tum jise rota hua chhoD gae the ek din

hum ne us sham ko sine se laga rakkha hai

chain lene nahin deta ye kisi taur mujhe

teri yaadon ne jo tufan uTha rakkha hai

jaane wale ne kaha tha ki wo lauTega zarur

ek isi aas pe darwaza khula rakkha hai

tere jaane se jo ek dhul uThi thi gham ki

hum ne us dhul ko aankhon mein basa rakkha hai

mujh ko kal sham se wo yaad bahut aane laga

dil ne muddat se jo ek shaKHs bhula rakkha hai

aaKHiri bar jo aaya tha mere nam 'wasi'

main ne us KHat ko kaleje se laga rakkha hai