dil ki diwar pe mehrab bana kar rakhta

dil kī dīvār pe mehrāb banā kar rakhtā

tujh ko āñkhoñ ke liye ḳhvāb banā kar rakhtā

rah ga.e tum to kisī ke liye jugnū ban kar

mujh ko milte to maiñ mahtāb banā kar rakhtā

mujh se laḌnā hī agar thā to qabīle meñ phir

ka.ī rustam ka.ī sohrāb banā kar rakhtā

aag paanī meñ lagānī hī nahīñ jab tum ko

ḳhud ko kab tak koī tālāb banā kar rakhtā

barf jamtī hī nahīñ jism kī dīvāroñ par

tū agar ḳhuun ko tezāb banā kar rakhtā

ḳhatm ho jaatā maza phir to use paḌhne kā

tū 'ibārat meñ jo e'rāb banā kar rakhtā

ḳhatm kar detā vajūd apnā mohabbat ke liye

ḳhud ko qatra tujhe sailāb banā kar rakhtā

sab haiñ talvār ye lakḌī kī magar ai 'dānish'

phir bhī kuchh dost kuchh ahbāb banā kar rakhtā

dil ki diwar pe mehrab bana kar rakhta

tujh ko aankhon ke liye KHwab bana kar rakhta

rah gae tum to kisi ke liye jugnu ban kar

mujh ko milte to main mahtab bana kar rakhta

mujh se laDna hi agar tha to qabile mein phir

kai rustam kai sohrab bana kar rakhta

aag pani mein lagani hi nahin jab tum ko

KHud ko kab tak koi talab bana kar rakhta

barf jamti hi nahin jism ki diwaron par

tu agar KHun ko tezab bana kar rakhta

KHatm ho jata maza phir to use paDhne ka

tu 'ibarat mein jo e'rab bana kar rakhta

KHatm kar deta wajud apna mohabbat ke liye

KHud ko qatra tujhe sailab bana kar rakhta

sab hain talwar ye lakDi ki magar ai 'danish'

phir bhi kuchh dost kuchh ahbab bana kar rakhta