dil ko chhedegi pari-ru teri chitwan kab tak

dil ko chhedegī parī-rū tirī chitvan kab tak

tīr-e-nazzāra chaleñge pas-e-rauzan kab tak

raḳhna-sāzī nahīñ kartī hai vo chitvan kab tak

dekheñ rahte haiñ yūñhīñ band ye rauzan kab tak

āfateñ Dhā.eñge ye jaan ke dushman kab tak

qāfile lūTeñge in āñkhoñ ke rahzan kab tak

rone ko aa.ī hai mehmān hai ik raat kī ye

sham.a marqad pe rahegī mire raushan kab tak

mausam-e-gul hai havā-e-saharī kā jhoñkā

shāḳh-e-gul par tirā bulbul ye nasheman kab tak

zindagī shauq-e-shahādat meñ vabāl-e-jāñ hai

dosh par baar rahegā tirā gardan kab tak

maz.hab-e-ishq meñ ḳhāmī hai ḳhayāl-e-nāmūs

fikr-e-rusvā.ī-o-andesha-e-dushman kab tak

shauq-e-dīdār hai betāb hai dil sūrat-e-barq

hogā tai marhala-e-vādī-e-aiman kab tak

ab to kuchh hosh karo ġhamza-e-bejā chhoḌo

māshā-allāh javāñ ho ye laḌakpan kab tak

kar musalmān unheñ dikhlā ke ruḳh ai but ba-ḳhudā

raheñ zunnār ke phande meñ barahman kab tak

kar bhī de fitna-e-qāmat se kahīñ hashr bapā

taḌpeñ kushte tire qātil tah-e-madfan kab tak

rahm kar haal par ab mere ḳhudārā o turk

ḳham rahe shauq-e-shahādat meñ ye gardan kab tak

nahīñ kartā ruḳh idhar haif humā-e-shamshīr

maiñ bichhā.e rahūñ dām-e-rag-e-gardan kab tak

ham bhī Talte nahīñ ab aap ke dar se tā-hashr

dekhnā to hai girī rahtī hai chilman kab tak

apne apne but-e-pindār ko toḌeñ 'akbar'

yūñhī laḌte raheñge shaiḳh-o-barahman kab tak

dil ko chhedegi pari-ru teri chitwan kab tak

tir-e-nazzara chalenge pas-e-rauzan kab tak

raKHna-sazi nahin karti hai wo chitwan kab tak

dekhen rahte hain yunhin band ye rauzan kab tak

aafaten Dhaenge ye jaan ke dushman kab tak

qafile luTenge in aankhon ke rahzan kab tak

rone ko aai hai mehman hai ek raat ki ye

shama marqad pe rahegi mere raushan kab tak

mausam-e-gul hai hawa-e-sahari ka jhonka

shaKH-e-gul par tera bulbul ye nasheman kab tak

zindagi shauq-e-shahadat mein wabaal-e-jaan hai

dosh par bar rahega tera gardan kab tak

mazhab-e-ishq mein KHami hai KHayal-e-namus

fikr-e-ruswai-o-andesha-e-dushman kab tak

shauq-e-didar hai betab hai dil surat-e-barq

hoga tai marhala-e-wadi-e-aiman kab tak

ab to kuchh hosh karo ghamza-e-beja chhoDo

masha-allah jawan ho ye laDakpan kab tak

kar musalman unhen dikhla ke ruKH ai but ba-KHuda

rahen zunnar ke phande mein barahman kab tak

kar bhi de fitna-e-qamat se kahin hashr bapa

taDpen kushte tere qatil tah-e-madfan kab tak

rahm kar haal par ab mere KHudara o turk

KHam rahe shauq-e-shahadat mein ye gardan kab tak

nahin karta ruKH idhar haif huma-e-shamshir

main bichhae rahun dam-e-rag-e-gardan kab tak

hum bhi Talte nahin ab aap ke dar se ta-hashr

dekhna to hai giri rahti hai chilman kab tak

apne apne but-e-pindar ko toDen 'akbar'

yunhi laDte rahenge shaiKH-o-barahman kab tak