dil ko jis waqt KHayal saf-e-mizhgan hoga

dil ko jis vaqt ḳhayāl saf-e-mizhgāñ hogā

pā-e-jāñ meñ ḳhalish-e-ḳhār-e-muġhīlāñ hogā

tālib-e-marg huuñ yaaro na karo chāra mirā

mujh pe ehsāñ jo na kījegā to ehsāñ hogā

vā.izā huur mile ḳhuld meñ to kyā hāsil

ham ko kab chain ba-juz sohbat-e-insāñ hogā

ba-ḳhudā hotā na hargiz kabhī ḳhvāhāñ terā

jāntā gar tū mirī jaan kā ḳhvāhāñ hogā

us mah-e-hind se ho tū na muqābil hargiz

munfa.il varna bahut ai mah-e-kan.āñ hogā

aur pairāye meñ mumkin nahīñ qudrat kā zuhūr

hai yaqīñ mujh ko ḳhudā sūrat-e-insāñ hogā

maktab-e-ġham meñ hai majnūñ se talammuz ham ko

ab bayābāñ kā sabaq jā-e-gulistāñ hogā

is qadar tang huuñ ho jā.ūñgā ḳhud kāfir maiñ

dil-e-kāfir jo kabhī merā musalmāñ hogā

vasl phir ho ki na ho dil kī tasallī ko mire

apne muñh se to zarā kah de ki haañ haañ hogā

baaġh meñ nāla-e-bulbul hī ḳhush aa.e shāyad

ḳhanda-e-gul se mizāj apnā pareshāñ hogā

mol ġham ham ne liyā ḳhud na karegā aisā

ba-ḳhudā gar koī nādān se nādāñ hogā

tishna-lab jis ke liye phirte haiñ sab ḳhizr-o-masīh

yaar terā hī dahan chashma-e-haivāñ hogā

is qadar jald jo ai ahd-shikan TuuT gayā

rishta-e-jān hamārā tirā paimāñ hogā

vā.izā ḳhuld meñ kyā vasl-e-butāñ bhī hogā

ham na jā.eñge jo vaañ bhī ġham-e-hijrāñ hogā

uns hai mādda-e-asl-o-sarisht-e-insāñ

ulfat insān se rakkhegā jo insāñ hogā

mujh ko fursat thī kahāñ rone kī rotā kyūñkar

mujh pe bāñdhā kisī dushman ne ye tūfāñ hogā

saiqal-e-ishq se ā.īna hai hālat merī

jo mire haal ko dekhegā vo hairāñ hogā

sun ke ash.ār tire bazm-e-suḳhan meñ ai 'sehr'

vo phaḌak jā.egā jo koī suḳhan-dāñ hogā

dil ko jis waqt KHayal saf-e-mizhgan hoga

pa-e-jaan mein KHalish-e-KHar-e-mughilan hoga

talib-e-marg hun yaro na karo chaara mera

mujh pe ehsan jo na kijega to ehsan hoga

waiza hur mile KHuld mein to kya hasil

hum ko kab chain ba-juz sohbat-e-insan hoga

ba-KHuda hota na hargiz kabhi KHwahan tera

jaanta gar tu meri jaan ka KHwahan hoga

us mah-e-hind se ho tu na muqabil hargiz

munfail warna bahut ai mah-e-kanan hoga

aur pairaye mein mumkin nahin qudrat ka zuhur

hai yaqin mujh ko KHuda surat-e-insan hoga

maktab-e-gham mein hai majnun se talammuz hum ko

ab bayaban ka sabaq ja-e-gulistan hoga

is qadar tang hun ho jaunga KHud kafir main

dil-e-kafir jo kabhi mera musalman hoga

wasl phir ho ki na ho dil ki tasalli ko mere

apne munh se to zara kah de ki han han hoga

bagh mein nala-e-bulbul hi KHush aae shayad

KHanda-e-gul se mizaj apna pareshan hoga

mol gham hum ne liya KHud na karega aisa

ba-KHuda gar koi nadan se nadan hoga

tishna-lab jis ke liye phirte hain sab KHizr-o-masih

yar tera hi dahan chashma-e-haiwan hoga

is qadar jald jo ai ahd-shikan TuT gaya

rishta-e-jaan hamara tera paiman hoga

waiza KHuld mein kya wasl-e-butan bhi hoga

hum na jaenge jo wan bhi gham-e-hijran hoga

uns hai madda-e-asl-o-sarisht-e-insan

ulfat insan se rakkhega jo insan hoga

mujh ko fursat thi kahan rone ki rota kyunkar

mujh pe bandha kisi dushman ne ye tufan hoga

saiqal-e-ishq se aaina hai haalat meri

jo mere haal ko dekhega wo hairan hoga

sun ke ashaar tere bazm-e-suKHan mein ai 'sehr'

wo phaDak jaega jo koi suKHan-dan hoga