دل کو جس وقت خیال صف مژگاں ہوگا

دل کو جس وقت خیال صف مژگاں ہوگا

پائے جاں میں خلش خار مغیلاں ہوگا

طالب مرگ ہوں یارو نہ کرو چارہ مرا

مجھ پہ احساں جو نہ کیجے گا تو احساں ہوگا

واعظا حور ملے خلد میں تو کیا حاصل

ہم کو کب چین بجز صحبت انساں ہوگا

بخدا ہوتا نہ ہرگز کبھی خواہاں تیرا

جانتا گر تو مری جان کا خواہاں ہوگا

اوس مہ ہند سے ہو تو نہ مقابل ہرگز

منفعل ورنہ بہت اے مہ کنعاں ہوگا

اور پیرایہ میں ممکن نہیں قدرت کا ظہور

ہے یقیں مجھ کو خدا صورت انساں ہوگا

مکتب غم میں ہے مجنوں سے تلمذ ہم کو

اب بیاباں کا سبق جائے گلستاں ہوگا

اس قدر تنگ ہوں ہو جاؤں گا خود کافر میں

دل کافر جو کبھی میرا مسلماں ہوگا

وصل پھر ہو کہ نہ ہو دل کی تسلی کو مرے

اپنے منہ سے تو ذرا کہہ دے کہ ہاں ہاں ہوگا

باغ میں نالۂ بلبل ہی خوش آئے شاید

خندۂ گل سے مزاج اپنا پریشاں ہوگا

مول غم ہم نے لیا خود نہ کرے گا ایسا

بخدا گر کوئی نادان سے ناداں ہوگا

تشنہ لب جس کے لئے پھرتے ہیں سب خضر و مسیح

یار تیرا ہی دہن چشمۂ حیواں ہوگا

اس قدر جلد جو اے عہد شکن ٹوٹ گیا

رشتۂ جان ہمارا ترا پیماں ہوگا

واعظا خلد میں کیا وصل بتاں بھی ہوگا

ہم نہ جائیں گے جو واں بھی غم ہجراں ہوگا

انس ہے مادۂ اصل و سرشت انساں

الفت انسان سے رکھے گا جو انساں ہوگا

مجھ کو فرصت تھی کہاں رونے کی روتا کیوں کر

مجھ پہ باندھا کسی دشمن نے یہ طوفاں ہوگا

صیقل عشق سے آئینہ ہے حالت میری

جو مرے حال کو دیکھے گا وہ حیراں ہوگا

سن کے اشعار ترے بزم سخن میں اے سحرؔ

وہ پھڑک جائے گا جو کوئی سخنداں ہوگا