dil-lagī ġhairoñ se be-jā hai mirī jaañ chhoḌ de
maan kahnā tere sadqe tere qurbāñ chhoḌ de
āshiq-e-jāñ-bāz kyūñkar kū-e-jānāñ chhoḌ de
apnā aa ghar kis tarah sher-e-niystāñ chhoḌ de
ye nahīñ kahtā ki sayyād ab mujhe āzād kar
do ghaḌī ko bahr-e-gul-gasht-e-gulistāñ chhoḌ de
kaun kāfir phir kare sajda ḳhudā ke sāmne
kah to baiThe mujh se vo but apnā īmāñ chhoḌ de
tañg huuñ diq huuñ koī dam meñ nikal jā.egā dam
chhoḌ de dast-e-junūñ merā garebāñ chhoḌ de
ġhair-mumkin hai jo bhūlūñ ghar tirā ai rashk-e-hūr
mujh ko jannat meñ agar le jā ke rizvāñ chhoḌ de
ġhamza-e-bejā nahīñ uThte phuñkā jaatā hai dil
garmiyāñ apnī tū ai mehr-e-daraḳhshāñ chhoḌ de
phir phañsūñ maiñ dām-e-gesū meñ to kāfir jāniyo
chhoḌ de lillāh ab o nā-musalmāñ chhoḌ de
ho na rāz-e-ishq ifshā ābrū-rezī na ho
phuuT bahnā tū agar ai chashm-e-giryāñ chhoḌ de
tauq pheñkeñge gale meñ misl-e-qumrī saikḌoñ
nāzukī raftār o sarv-e-ḳhirāmāñ chhoḌ de
husn kā juuyā huuñ muddat se maiñ dīvāna-mizāj
mujh ko pariyoñ ke akhāḌe meñ sulaimāñ chhoḌ de
yuuñ bhulā.ī dil se yād-e-mus.haf-e-ruḳhsār 'rind'
hifz kar ke jis tarah se koī qur.āñ chhoḌ de
dil-lagi ghairon se be-ja hai meri jaan chhoD de
man kahna tere sadqe tere qurban chhoD de
aashiq-e-jaan-baz kyunkar ku-e-jaanan chhoD de
apna aa ghar kis tarah sher-e-niystan chhoD de
ye nahin kahta ki sayyaad ab mujhe aazad kar
do ghaDi ko bahr-e-gul-gasht-e-gulistan chhoD de
kaun kafir phir kare sajda KHuda ke samne
kah to baiThe mujh se wo but apna iman chhoD de
tang hun diq hun koi dam mein nikal jaega dam
chhoD de dast-e-junun mera gareban chhoD de
ghair-mumkin hai jo bhulun ghar tera ai rashk-e-hur
mujh ko jannat mein agar le ja ke rizwan chhoD de
ghamza-e-beja nahin uThte phunka jata hai dil
garmiyan apni tu ai mehr-e-daraKHshan chhoD de
phir phansun main dam-e-gesu mein to kafir jaaniyo
chhoD de lillah ab o na-musalman chhoD de
ho na raaz-e-ishq ifsha aabru-rezi na ho
phuT bahna tu agar ai chashm-e-giryan chhoD de
tauq phenkenge gale mein misl-e-qumri saikDon
nazuki raftar o sarw-e-KHiraman chhoD de
husn ka juya hun muddat se main diwana-mizaj
mujh ko pariyon ke akhaDe mein sulaiman chhoD de
yun bhulai dil se yaad-e-mushaf-e-ruKHsar 'rind'
hifz kar ke jis tarah se koi quran chhoD de
Source:
Deewan-e-Rind(Guldast-e-ishq) (Rekhta Website) (Pg. 134)
-
Author:
Rind Lakhnavi
-
- Edition: 1931
- Publisher: Munshi Nawal Kishor, Lucknow
- Year of Publication: 1930
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
