dil mein aaseb-e-tamanna ko chhupane wale

dil meñ āseb-e-tamanna ko chhupāne vaale

saath meñ ro le kabhī mujh ko rulāne vaale

laakh tā'vīz bañdhe ḳhuub du'ā.eñ māñgīñ

magar aa.e hī nahīñ lauT ke aane vaale

kyā guzartī hai mire dil pe judā.ī meñ tirī

tujh ko ehsās bhī hai chhoḌ ke jaane vaale

yaad aate haiñ to aate hī chale jaate haiñ

dil se jaate hī nahīñ dil ko dukhāne vaale

'umr bhar DhūñDte phirte rahe qadmoñ ke nishāñ

mere qadmoñ se qadam apne milāne vaale

zindagī tū ne hameñ chain se jiine na diyā

ab nahīñ ham bhī tire naaz uThāne vaale

merī taqdīr faqat tū hī badal saktā hai

merī taqdīr badal duniyā banāne vaale

dekho kis tarh badal jā.egā ye vaqt kā khel

ḳhud bhī gir jā.eñge auroñ ko girāne vaale

Dūbnā in kā muqaddar thā so Duube varna

tair bhī sakte the ye kashtī banāne vaale

dil mein aaseb-e-tamanna ko chhupane wale

sath mein ro le kabhi mujh ko rulane wale

lakh ta'wiz bandhe KHub du'aen mangin

magar aae hi nahin lauT ke aane wale

kya guzarti hai mere dil pe judai mein teri

tujh ko ehsas bhi hai chhoD ke jaane wale

yaad aate hain to aate hi chale jate hain

dil se jate hi nahin dil ko dukhane wale

'umr bhar DhunDte phirte rahe qadmon ke nishan

mere qadmon se qadam apne milane wale

zindagi tu ne hamein chain se jine na diya

ab nahin hum bhi tere naz uThane wale

meri taqdir faqat tu hi badal sakta hai

meri taqdir badal duniya banane wale

dekho kis tarh badal jaega ye waqt ka khel

KHud bhi gir jaenge auron ko girane wale

Dubna in ka muqaddar tha so Dube warna

tair bhi sakte the ye kashti banane wale