dil mein jab wahshat si paida KHana-virani kare

dil meñ jab vahshat sī paidā ḳhāna-vīrānī kare

aise meñ ābād is dil ko suḳhan-dānī kare

ek ye betāb dil aur us pe yād-e-yār aah

hijr ke ek ek pal ko kitnā tūlānī kare

ab to ye dil kā lahū bhī ḳhushk ho jaane ko hai

ab to koī mo'jiza ye aañkh kā paanī kare

kārobār-e-‘ishq meñ nuqsān-e-jān-o-dil to hai

par yahī nuqsāñ hai jo faanī ko lāfānī kare

ġhair kā har nang to parda hai merī zaat kā

mujh ko paanī paanī merī apnī 'uryānī kare

sun ke 'mīr-anjum’ ko bazm-e-yār meñ sab ne kahā

hai to sīdhā-sāda sā par baat bā-mā'nī kare

dil mein jab wahshat si paida KHana-virani kare

aise mein aabaad is dil ko suKHan-dani kare

ek ye betab dil aur us pe yaad-e-yar aah

hijr ke ek ek pal ko kitna tulani kare

ab to ye dil ka lahu bhi KHushk ho jaane ko hai

ab to koi mo'jiza ye aankh ka pani kare

karobar-e-‘ishq mein nuqsan-e-jaan-o-dil to hai

par yahi nuqsan hai jo fani ko lafani kare

ghair ka har nang to parda hai meri zat ka

mujh ko pani pani meri apni 'uryani kare

sun ke 'mir-anjum’ ko bazm-e-yar mein sab ne kaha

hai to sidha-sada sa par baat ba-ma'ni kare