دل میں مرے خیال رخ مہ جبیں رہا

دل میں مرے خیال رخ مہ جبیں رہا

سایہ پری کا شیشہ میں صورت گزیں رہا

اللہ رے میرے بخت کی شومی کہ وصل میں

پردے ہی میں حجاب کے وہ نازنیں رہا

اس بت کی بندگی سے نہ باز آیا بت پرست

کم بخت دل مخالف شرع متیں ریا

محصور غم ہوں نقطۂ پرکار کی طرح

میں مرکز مظالم ارباب کیں رہا

خون جگر سے زیست کی امید تھی مگر

وہ بھی بہ حکم شرع محبت نہیں رہا

حاصل ہوا نہ بحر تصور میں در وصل

ہر چند دل مثال صدف تہ نشیں رہا

مظہرؔ حریص لذت غم ان کے عشق میں

پابند تجھ سا اے مگس انگبیں رہا