دل میں رہ جاتے ہیں سب لوگ بھلانے والے

دل میں رہ جاتے ہیں سب لوگ بھلانے والے

ہم ہیں ہر حال میں رشتوں کو نبھانے والے

کیا کوئی رنگ ہے جو مجھ کو مکمل کر دے

میری تصویر کو رنگوں سے سجانے والے

ہم نے تا عمر تجھے من میں بسائے رکھا

رنج تو اور بھی تھے دل سے لگانے والے

ایسا لگتا تھا مجھے کھو کے بدل جائے گا

آج بھی اس کے ہیں انداز پرانے والے

میری پہچان تو دنیا میں تھی تجھ سے لیکن

اب نئے ڈھنگ سے جانیں گے زمانے والے

مجھ کو جانا ہے کسی اور ہی منزل کی طرف

اب مجھے یاد نہ کر چھوڑ کے جانے والے

میں نے اس واسطے اس آگ کو بجھنے نہ دیا

میرے اپنے تھے مجھے زندہ جلانے والے