dil merā terā tāba-e-farmāñ hai kyā karūñ
ab terā kufr hī mirā īmāñ hai kyā karūñ
bā-hosh huuñ magar mirā dāman hai chaak chaak
aalam ye dekh dekh ke hairāñ hai kyā karūñ
har tarah kā sukūn hai har tarah kā hai kaif
phir bhī ye merā qalb pareshāñ hai kyā karūñ
kahtā nahīñ huuñ aur zamāna hai bā-ḳhabar
chehre se dil kā haal numāyāñ hai kyā karūñ
dāman karūñ na chaak ye mumkin to hai magar
muztar har ek tār-e-garebāñ hai kyā karūñ
saada sā ik varaq huuñ kitāb-e-hayāt kā
hasrat se ab na ab koī armāñ hai kyā karūñ
har samt pā rahā huuñ vahī rañg-e-dil-fareb
hāthoñ meñ kufr ke mirā īmāñ hai kyā karūñ
dāġhoñ kā qalb-e-zār se mumkin to hai ilaaj
un ke hī dam se dil meñ charāġhāñ hai kyā karūñ
ik be-vafā ke vāste se sab kuchh luTā diyā
'bahzād' ab na diin na īmāñ hai kyā karūñ
dil mera tera taba-e-farman hai kya karun
ab tera kufr hi mera iman hai kya karun
ba-hosh hun magar mera daman hai chaak chaak
aalam ye dekh dekh ke hairan hai kya karun
har tarah ka sukun hai har tarah ka hai kaif
phir bhi ye mera qalb pareshan hai kya karun
kahta nahin hun aur zamana hai ba-KHabar
chehre se dil ka haal numayan hai kya karun
daman karun na chaak ye mumkin to hai magar
muztar har ek tar-e-gareban hai kya karun
sada sa ek waraq hun kitab-e-hayat ka
hasrat se ab na ab koi arman hai kya karun
har samt pa raha hun wahi rang-e-dil-fareb
hathon mein kufr ke mera iman hai kya karun
daghon ka qalb-e-zar se mumkin to hai ilaj
un ke hi dam se dil mein charaghan hai kya karun
ek be-wafa ke waste se sab kuchh luTa diya
'bahzad' ab na din na iman hai kya karun
Source:
(Pg. 55)
-
Author:
Behzad Lakhnavi
-
- Publisher: Saqi Book Depot, Delhi
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.