dil-o-dimagh mein Dhalte rahe sawal bahut

dil-o-dimāġh meñ Dhalte rahe savāl bahut

ġhazab kī aag thī jalte rahe savāl bahut

javāb milne kī sūrat na thī koī lekin

har ek lab se nikalte rahe savāl bahut

nigāh-e-husn se aayā na jab javāb koī

nigāh-e-'ishq meñ palte rahe savāl bahut

vo jis ke paas zaḳhīra thā sab javāboñ kā

usī kī bazm meñ Talte rahe savāl bahut

ḳhudā ne baḳhshī thī mujh ko kamāl kī garmī

mire lahū meñ pighalte rahe savāl bahut

safar tamām huā ruk ga.e qadam phir bhī

rah-e-hayāt meñ chalte rahe savāl bahut

agarche mil ga.ī āḳhir kisī samundar meñ

nadī ke dil meñ sulagte rahe savāl bahut

usī ke dam se 'kañval' zindagī meñ raunaq thī

vo jis ke dam se machalte rahe savāl bahut

dil-o-dimagh mein Dhalte rahe sawal bahut

ghazab ki aag thi jalte rahe sawal bahut

jawab milne ki surat na thi koi lekin

har ek lab se nikalte rahe sawal bahut

nigah-e-husn se aaya na jab jawab koi

nigah-e-'ishq mein palte rahe sawal bahut

wo jis ke pas zaKHira tha sab jawabon ka

usi ki bazm mein Talte rahe sawal bahut

KHuda ne baKHshi thi mujh ko kamal ki garmi

mere lahu mein pighalte rahe sawal bahut

safar tamam hua ruk gae qadam phir bhi

rah-e-hayat mein chalte rahe sawal bahut

agarche mil gai aaKHir kisi samundar mein

nadi ke dil mein sulagte rahe sawal bahut

usi ke dam se 'kanwal' zindagi mein raunaq thi

wo jis ke dam se machalte rahe sawal bahut