dil pe raushan ek daricha kya hua

dil pe raushan ik darīcha kyā huā

band ham par ghar kā darvāza huā

is tarah dekhā tujhe kal ḳhvāb meñ

ḳhvāb pe tā'bīr kā dhokā huā

tak rahā hai āsmāñ ko āsmāñ

jhiil kī āġhosh meñ simTā huā

ai havā-e-gulsitāñ ḳhush-āmdīd

yaad to aayā koī bhūlā huā

jis taraf jaatā hai dil kā rāsta

us taraf bhī kyā kabhī jaanā huā

rāste lagte haiñ kyoñ chalte hue

kārvāñ lagtā hai kyoñ Thahrā huā

zindagī kitnī subuk-raftār hai

ḳhud se mil kar aaj andāza huā

dekhiye kyā vaqt kī parchhā.iyāñ

joḌiye kyā aa.ina TuuTā huā

jaane vaale dil se jab jaate nahīñ

phir yahāñ āñkhoñ se ojhal kyā huā

bun rahā huuñ jaane kin lamhoñ ke ḳhvāb

vaqt kī dahlīz par baiThā huā

hai zamīñ oḌhe hue gard-o-ġhubār

āsmāñ par chāñd hai niklā huā

is tarah bastī hai koī bastiyāñ

rāste sunsān dil ujḌā huā

vo havā-e-kū-e-jānāñ kyā huī

vo ġhubār-e-rāh-paimā kyā huā

tū ne dekhā hī nahīñ shām-e-firāq

ḳhema-e-dil se dhuāñ uThtā huā

ik taraf hai turra-e-nām-o-nasab

ik taraf taqdīr kā likkhā huā

koī to naqsh-e-qadam aa.e nazar

sarhad-e-idrāk se niklā huā

pūchhiye kis se yahāñ rahtā hai kaun

vo jo rahtā thā yahāñ vo kyā huā

ye bhī mumkin hai udhar koī na ho

aur ho bas aa.ina rakhā huā

aane vaale vaqt kī āvāz huuñ

maiñ nahīñ lamha koī guzrā huā

kar rahā huuñ aap ḳhud apnā tavāf

phir rahā huuñ ghar meñ baulāyā huā

dil pe raushan ek daricha kya hua

band hum par ghar ka darwaza hua

is tarah dekha tujhe kal KHwab mein

KHwab pe ta'bir ka dhoka hua

tak raha hai aasman ko aasman

jhil ki aaghosh mein simTa hua

ai hawa-e-gulsitan KHush-amdid

yaad to aaya koi bhula hua

jis taraf jata hai dil ka rasta

us taraf bhi kya kabhi jaana hua

raste lagte hain kyon chalte hue

karwan lagta hai kyon Thahra hua

zindagi kitni subuk-raftar hai

KHud se mil kar aaj andaza hua

dekhiye kya waqt ki parchhaiyan

joDiye kya aaina TuTa hua

jaane wale dil se jab jate nahin

phir yahan aankhon se ojhal kya hua

bun raha hun jaane kin lamhon ke KHwab

waqt ki dahliz par baiTha hua

hai zamin oDhe hue gard-o-ghubar

aasman par chand hai nikla hua

is tarah basti hai koi bastiyan

raste sunsan dil ujDa hua

wo hawa-e-ku-e-jaanan kya hui

wo ghubar-e-rah-paima kya hua

tu ne dekha hi nahin sham-e-firaq

KHema-e-dil se dhuan uThta hua

ek taraf hai turra-e-nam-o-nasab

ek taraf taqdir ka likkha hua

koi to naqsh-e-qadam aae nazar

sarhad-e-idrak se nikla hua

puchhiye kis se yahan rahta hai kaun

wo jo rahta tha yahan wo kya hua

ye bhi mumkin hai udhar koi na ho

aur ho bas aaina rakha hua

aane wale waqt ki aawaz hun

main nahin lamha koi guzra hua

kar raha hun aap KHud apna tawaf

phir raha hun ghar mein baulaya hua