دل پھر ہے جستجو میں پریشاں برا ہوا

دل پھر ہے جستجو میں پریشاں برا ہوا

مشکل نظر کی ہو گئی آساں برا ہوا

اچھا ہوا یا درد کا درماں برا ہوا

ہونا کسی کا حسن پہ نازاں برا ہوا

تسکین مل رہی ہے تصور سے رات دن

اپنا رہا نہ کوئی نگہباں برا ہوا

مچلے ہوئے شباب کے آثار دیکھ کر

ہشیار ہو گیا غم ناداں برا ہوا

سچ پوچھئے تو حسن کے ہر جلوہ زار میں

انساں فروش دین کا ایماں برا ہوا

دنیا پرکھ چکے ہیں محاسن حیات کے

نیت میں فرق آیا کہ انساں برا ہوا

بس آبرو کا مول ہے جینے میں جس طرح

خوشبو گئی کہ رنگ گلستاں برا ہوا

آخر سپرد خاک ہوا خاکسار بھی

مٹی میں مل گیا ترا احساں برا ہوا

سمجھا تھا جس کو غیر کسی دن نگاہ نے

وہ درد دل میں ہو گیا مہماں برا ہوا

اک غم سے جذب شادؔ کے دریا اتر گئے

ساحل نواز ہو گیا طوفاں برا ہوا