dil pukara tera ehsan sitam-ara hota

dil pukārā tirā ehsāñ sitam-ārā hotā

thā jahāñ dard vahīñ tiir bhī maarā hotā

kuchh na kuchh to mujhe marne kā sahārā hotā

haath achchhā sahī dil par mire maarā hotā

phir muḳhātab kiyā tum ne mujhe ulTī hī naqāb

ġhash mujhe aatā jo pahlā sā nazārā hotā

ruuh bhī tan se nikaltī to ye dil meñ rahtā

aap kā tiir mujhe jaan se pyārā hotā

bach gayā maz.haka hotā dam-e-mahshar kaisā

aap ke dhoke meñ yūsuf ko pukārā hotā

phir mujhe koī zamāne meñ satātā na hasīñ

garche māthe pe raqam naam tumhārā hotā

faḳhr ho jaatā mujhe baat mirī rah jaatī

bazm-e-ushshāq meñ mujh se jo ishārā hotā

fasl garmī kī hai jī chāhtā hai ai saaqī

mai-kashī hotī jo dariyā kā kinārā hotā

tū agar tiir lagātā mirī peshānī par

hashr tak vo mirī qismat kā sitārā hotā

ye to batlāo jo hotī ye kisī aur kī bazm

yuuñ bigaḌ jaate agar zikr hamārā hotā

kisī majma.e meñ agar qatl vo kartā ham ko

naam jallād kā aur kaam hamārā hotā

maiñ to majbūr thā ahbāb se ye kahtā kaun

vo bhī aa lete to turbat meñ utārā hotā

dard-e-dil ne mirī us vaqt iāñat kī hai

ye na uThtā to vo pahlū se sidhārā hotā

maiñ samajhtā huuñ ki aana hai masīhā kā muhāl

chārāgar hañste jo aane kā sahārā hotā

nāsehā tū hī samajh josh-e-javānī meñ bhalā

dil kā marnā hameñ kis tarah gavārā hotā

ḳhair ab thoḌī sī paḌh lete 'shafīq' urdu ham

zindagī kā hameñ gar apnī sahārā hotā

dil pukara tera ehsan sitam-ara hota

tha jahan dard wahin tir bhi mara hota

kuchh na kuchh to mujhe marne ka sahaara hota

hath achchha sahi dil par mere mara hota

phir muKHatab kiya tum ne mujhe ulTi hi naqab

ghash mujhe aata jo pahla sa nazara hota

ruh bhi tan se nikalti to ye dil mein rahta

aap ka tir mujhe jaan se pyara hota

bach gaya mazhaka hota dam-e-mahshar kaisa

aap ke dhoke mein yusuf ko pukara hota

phir mujhe koi zamane mein satata na hasin

garche mathe pe raqam nam tumhaara hota

faKHr ho jata mujhe baat meri rah jati

bazm-e-ushshaq mein mujh se jo ishaara hota

fasl garmi ki hai ji chahta hai ai saqi

mai-kashi hoti jo dariya ka kinara hota

tu agar tir lagata meri peshani par

hashr tak wo meri qismat ka sitara hota

ye to batlao jo hoti ye kisi aur ki bazm

yun bigaD jate agar zikr hamara hota

kisi majmae mein agar qatl wo karta hum ko

nam jallad ka aur kaam hamara hota

main to majbur tha ahbab se ye kahta kaun

wo bhi aa lete to turbat mein utara hota

dard-e-dil ne meri us waqt ianat ki hai

ye na uThta to wo pahlu se sidhaara hota

main samajhta hun ki aana hai masiha ka muhaal

chaaragar hanste jo aane ka sahaara hota

naseha tu hi samajh josh-e-jawani mein bhala

dil ka marna hamein kis tarah gawara hota

KHair ab thoDi si paDh lete 'shafiq' urdu hum

zindagi ka hamein gar apni sahaara hota