دل سیر کچھ اتنا ہو پیمانہ نظر آئے

دل سیر کچھ اتنا ہو پیمانہ نظر آئے

جس سمت نظر جائے مے خانہ نظر آئے

لازم ہے کہ دنیا سے بیگانہ نظر آئے

وہ ہوش کا پیکر جو دیوانہ نظر آئے

صورت کا تری عالم دیوانہ نظر آئے

گر آنکھ کو پردے کا دھوکا نہ نظر آئے

اچھا ہے جو پھولوں کو کانٹا نہ نظر آئے

کیوں خلد کے بندوں کو ویرانہ نظر آئے

بنتا ہے کوئی اپنا اس یاس کی ظلمت میں

جب غم کے سوا کوئی یارانہ نظر آئے

اے ساقیٔ خودداری وہ جام پلا جس سے

زاہد کی حقیقت بھی رندانہ نظر آئے

ماحول پریشاں میں سادہ سی تمنا ہے

ہر آئینہ اب روئے جانانہ نظر آئے

گر شادؔ رہا چاہے اس چشم کا حامل بن

تنویر حرم جس میں بت خانہ نظر آئے