dil se manzur teri humne qayaadat nahin ki

dil se manzūr tirī ham ne qayādat nahīñ kī

ye alag baat abhī khul ke baġhāvat nahīñ kī

ham sazā-vār jo Thahre to sabab hai itnā

hukm-e-hākim pe kabhī ham ne itā.at nahīñ kī

ham ne mālik tujhe maanā hai to sachchā maanā

is liye terī kabhī jhūTī ibādat nahīñ kī

dostī meñ bhī faqat ek chalan rakkhā hai

dil ne inkār kiyā hai to rifāqat nahīñ kī

tū ne ḳhud chhoḌā mohabbat kā safar yaad to kar

maiñ ne to tujh se alag ho ke masāfat nahīñ kī

jhuum uTThegā agar us ko sunā.ūñ jā kar

ye ġhazal maiñ ne abhī nazr-e-samā.at nahīñ kī

us ko bhī apne ravayye pe koī uzr na thā

ham bhī the apnī anā meñ so ri.āyat nahīñ kī

ye to phir tujh se mohabbat kā thā qissa mirī jaañ

mere kis fe.al pe duniyā ne malāmat nahīñ kī

tū ne charche kiye har jā mirī rusvā.ī ke

maiñ ne ḳhud se bhī kabhī terī shikāyat nahīñ kī

dostoñ ko bhī rahī vaqt kī qillat 'aḳhtar'

hāl-e-dil ham ne sunāne kī bhī aadat nahīñ kī

dil se manzur teri hum ne qayaadat nahin ki

ye alag baat abhi khul ke baghawat nahin ki

hum saza-war jo Thahre to sabab hai itna

hukm-e-hakim pe kabhi hum ne itaat nahin ki

hum ne malik tujhe mana hai to sachcha mana

is liye teri kabhi jhuTi ibaadat nahin ki

dosti mein bhi faqat ek chalan rakkha hai

dil ne inkar kiya hai to rifaqat nahin ki

tu ne KHud chhoDa mohabbat ka safar yaad to kar

main ne to tujh se alag ho ke masafat nahin ki

jhum uTThega agar us ko sunaun ja kar

ye ghazal main ne abhi nazr-e-samaat nahin ki

us ko bhi apne rawayye pe koi uzr na tha

hum bhi the apni ana mein so riayat nahin ki

ye to phir tujh se mohabbat ka tha qissa meri jaan

mere kis feal pe duniya ne malamat nahin ki

tu ne charche kiye har ja meri ruswai ke

main ne KHud se bhi kabhi teri shikayat nahin ki

doston ko bhi rahi waqt ki qillat 'aKHtar'

haal-e-dil hum ne sunane ki bhi aadat nahin ki