dil se meri yaadon ko riha kyon nahin karte

dil se mirī yādoñ ko rihā kyoñ nahīñ karte

tum phuul se ḳhushbū ko judā kyoñ nahīñ karte

rishtoñ ke bikharne kā sabab ham se na pūchho

tum ḳhud hī batāo ki vafā kyoñ nahīñ karte

barsoñ se koī ḳhat nahīñ aaya mire ghar par

ab naama yahāñ log likhā kyoñ nahīñ karte

jo duur huā ham se vahī pūchh rahā hai

ham fāsla miTne kī duā kyoñ nahīñ karte

kyoñ maazī kī har yaad sajā rakkhī hai ghar meñ

hai dard purānā to davā kyoñ nahīñ karte

mahfil meñ to tum naam mirā le nahīñ sakte

tanhā.ī meñ bhī zikr mirā kyoñ nahīñ karte

barsoñ se 'vilā' ek kināre pe khaḌī hai

tum niil ke sāhil pe milā kyoñ nahīñ karte

dil se meri yaadon ko riha kyon nahin karte

tum phul se KHushbu ko juda kyon nahin karte

rishton ke bikharne ka sabab hum se na puchho

tum KHud hi batao ki wafa kyon nahin karte

barson se koi KHat nahin aaya mere ghar par

ab nama yahan log likha kyon nahin karte

jo dur hua hum se wahi puchh raha hai

hum fasla miTne ki dua kyon nahin karte

kyon mazi ki har yaad saja rakkhi hai ghar mein

hai dard purana to dawa kyon nahin karte

mahfil mein to tum nam mera le nahin sakte

tanhai mein bhi zikr mera kyon nahin karte

barson se 'wila' ek kinare pe khaDi hai

tum nil ke sahil pe mila kyon nahin karte