dil se sunega kaun yahan par bayan-e-dil

dil se sunegā kaun yahāñ par bayān-e-dil

kis ke huzūr pesh karūñ armuġhān-e-dil

bād-e-muḳhālifāñ kī sa'ī rā.egāñ ga.ī

khulne ko musta'id hī nahīñ bādbān-e-dil

uktā ke har makīn ne hijrat kī Thaan lī

kitnī ḳharāsheñ aa ga.ī haiñ darmiyān-e-dil

us ne baḌhā lī ġhair se rasm-o-rah-e-ḳhirad

ham ne sajānā chhoḌ diyā hai makān-e-dil

sāya-fagan hai naqsh-e-kaf-e-pā-e-mustafā

manzil kī ḳhaak fikr kare kārvān-e-dil

ruk jā abhī na rahm-o-karam kī nigāh kar

ujḌegā be-hisāb abhī gulsitān-e-dil

har dam use 'azīz hai paakī nigāh kī

ḳhuuñ se likhī huī hai mirī dāstān-e-dil

dil se sunega kaun yahan par bayan-e-dil

kis ke huzur pesh karun armughan-e-dil

baad-e-muKHalifan ki sa'i raegan gai

khulne ko musta'id hi nahin baadban-e-dil

ukta ke har makin ne hijrat ki Than li

kitni KHarashen aa gai hain darmiyan-e-dil

us ne baDha li ghair se rasm-o-rah-e-KHirad

hum ne sajaana chhoD diya hai makan-e-dil

saya-fagan hai naqsh-e-kaf-e-pa-e-mustafa

manzil ki KHak fikr kare karwan-e-dil

ruk ja abhi na rahm-o-karam ki nigah kar

ujDega be-hisab abhi gulsitan-e-dil

har dam use 'aziz hai paki nigah ki

KHun se likhi hui hai meri dastan-e-dil