دل سے سنے گا کون یہاں پر بیان دل

دل سے سنے گا کون یہاں پر بیان دل

کس کے حضور پیش کروں ارمغان دل

باد مخالفاں کی سعی رائیگاں گئی

کھلنے کو مستعد ہی نہیں بادبان دل

اکتا کے ہر مکین نے ہجرت کی ٹھان لی

کتنی خراشیں آ گئی ہیں درمیان دل

اس نے بڑھا لی غیر سے رسم و رہ خرد

ہم نے سجانا چھوڑ دیا ہے مکان دل

سایہ فگن ہے نقش کف پائے مصطفیٰ

منزل کی خاک فکر کرے کاروان دل

رک جا ابھی نہ رحم و کرم کی نگاہ کر

اجڑے گا بے حساب ابھی گلستان دل

ہر دم اسے عزیز ہے پاکی نگاہ کی

خوں سے لکھی ہوئی ہے مری داستان دل