dil shahid-e-rah-e-daman na hua tha so hua

dil shahīd-e-rah-e-dāmāñ na huā thā so huā

TukḌe TukḌe jo garebāñ na huā thā so huā

barq be-nūr hai us ruḳh kī chamak ke aage

ālam-e-nūr kā insāñ na huā thā so huā

rone par mere huā hañs ke vo gul sharminda

ġhuncha saañ sar-ba-garebāñ na huā thā so huā

maiñ ne rangīñ na kiyā us kā taḌap kar dāman

sar-e-jallād pe ehsāñ na huā thā so huā

ho gayā dekh ke qaazī bhī taraf-dār us kā

be-gunah ḳhūn-e-musalmāñ na huā thā so huā

har zabāñ par mirī rusvā.ī kā afsāna hai

nusḳha-e-shauq pareshāñ na huā thā so huā

araq-ālūda jabīñ dekh kai dil Duub gayā

shabnam-e-bāġh se tūfāñ na huā thā so huā

qatl kar ke mujhe talvār ko toḌā us ne

ḳhūn-e-nāhaq se pashemāñ na huā thā so huā

yaar ke rū-e-kitābī kī karūñ kyā tārīf

baa'd qur.āñ ke jo qur.āñ na huā thā so huā

aañsū āñkhoñ se nikaltā hai so chingārī hai

parda-e-dil se numāyāñ na huā thā so huā

ātish-e-ishq se hai daaġh sarāpā merā

aadmī sarv-e-charāġhāñ na huā thā so huā

gard-e-rah ban ke huā sandal-e-peshānī-e-yār

zarra ḳhurshīd-e-daraḳhshāñ na huā thā so huā

pahroñ hī misra.a-e-saudā hai rulātā 'ātish'

tujhe ai dīda-e-giryāñ na huā thā so huā

dil shahid-e-rah-e-daman na hua tha so hua

TukDe TukDe jo gareban na hua tha so hua

barq be-nur hai us ruKH ki chamak ke aage

aalam-e-nur ka insan na hua tha so hua

rone par mere hua hans ke wo gul sharminda

ghuncha san sar-ba-gareban na hua tha so hua

main ne rangin na kiya us ka taDap kar daman

sar-e-jallad pe ehsan na hua tha so hua

ho gaya dekh ke qazi bhi taraf-dar us ka

be-gunah KHun-e-musalman na hua tha so hua

har zaban par meri ruswai ka afsana hai

nusKHa-e-shauq pareshan na hua tha so hua

araq-aluda jabin dekh kai dil Dub gaya

shabnam-e-bagh se tufan na hua tha so hua

qatl kar ke mujhe talwar ko toDa us ne

KHun-e-nahaq se pasheman na hua tha so hua

yar ke ru-e-kitabi ki karun kya tarif

ba'd quran ke jo quran na hua tha so hua

aansu aankhon se nikalta hai so chingari hai

parda-e-dil se numayan na hua tha so hua

aatish-e-ishq se hai dagh sarapa mera

aadmi sarw-e-charaghan na hua tha so hua

gard-e-rah ban ke hua sandal-e-peshani-e-yar

zarra KHurshid-e-daraKHshan na hua tha so hua

pahron hi misra-e-sauda hai rulata 'atish'

tujhe ai dida-e-giryan na hua tha so hua