dil-tang hun makan ke andar paDa hua

dil-tañg huuñ makān ke andar paḌā huā

bāhar abad kā qufl hai dar par paḌā huā

mujh par garāñ guzartī hai merī sadā kī guuñj

chup huuñ durūn-e-gumbad-e-be-dar paḌā huā

mumkin jo ho to ek nazar muḌ ke dekh le

ik naqsh hai zamīn pe miT kar paḌā huā

maiñ hī nahīñ huuñ din ke bagūle ke saath saath

sūraj ke paañv meñ bhī hai chakkar paḌā huā

khul hī ga.ī hai aañkh to āvāz de ke dekh

ḳhāmosh kyuuñ hai shab kā samundar paḌā huā

baiThā huā huuñ chhup ke havā ke hisār meñ

har-samt hai ġhanīm kā lashkar paḌā huā

mujh ko havā.eñ chalne se pahle sameT lo

maiñ rahguzār meñ huuñ bikhar kar paḌā huā

jaise ho koī mere ta.āqub meñ rāt-din

apne vajūd kā hai mujhe Dar paḌā huā

maiñ chhuptā phir rahā huuñ ḳhud apnī hī zaat se

'qaisar' mirā azaab hai mujh par paḌā huā

dil-tang hun makan ke andar paDa hua

bahar abad ka qufl hai dar par paDa hua

mujh par garan guzarti hai meri sada ki gunj

chup hun durun-e-gumbad-e-be-dar paDa hua

mumkin jo ho to ek nazar muD ke dekh le

ek naqsh hai zamin pe miT kar paDa hua

main hi nahin hun din ke bagule ke sath sath

suraj ke panw mein bhi hai chakkar paDa hua

khul hi gai hai aankh to aawaz de ke dekh

KHamosh kyun hai shab ka samundar paDa hua

baiTha hua hun chhup ke hawa ke hisar mein

har-samt hai ghanim ka lashkar paDa hua

mujh ko hawaen chalne se pahle sameT lo

main rahguzar mein hun bikhar kar paDa hua

jaise ho koi mere taaqub mein raat-din

apne wajud ka hai mujhe Dar paDa hua

main chhupta phir raha hun KHud apni hi zat se

'qaisar' mera azab hai mujh par paDa hua