dil Thahra ek tabassum par kuchh aur baha ai jaan nahin

dil Thahrā ek tabassum par kuchh aur bahā ai jaan nahīñ

gar hañs diije aur le liije to fā.eda hai nuqsān nahīñ

ye naaz hai yā istiġhnā hai yā tarz-e-taġhāful hai yaaro

jo laakh koī taḌpe siske fariyād kare kuchh dhyān nahīñ

jab suntā hai ahvāl mirā yuuñ kahtā hai ayyārī se

hai kaun vo us se ham ko to kuchh jaan nahīñ pahchān nahīñ

kuchh ban nahīñ aatā kyā kiije kis taur se miliye ai hamdam

vo dekh hameñ ruk jaatā hai aur ham ko chain ik aan nahīñ

tar dekh ke merī āñkhoñ ko ye baat sunātā hai hañs kar

haiñ kahte jis ko chaah miyāñ vo mushkil hai āsān nahīñ

dil phañs kar us kī zulfoñ meñ tadbīr rihā.ī kī mat kar

kab chhūTā us ke daam se tū vo daanā hai nādān nahīñ

dil Thahra ek tabassum par kuchh aur baha ai jaan nahin

gar hans dije aur le lije to faeda hai nuqsan nahin

ye naz hai ya istighna hai ya tarz-e-taghaful hai yaro

jo lakh koi taDpe siske fariyaad kare kuchh dhyan nahin

jab sunta hai ahwal mera yun kahta hai ayyari se

hai kaun wo us se hum ko to kuchh jaan nahin pahchan nahin

kuchh ban nahin aata kya kije kis taur se miliye ai hamdam

wo dekh hamein ruk jata hai aur hum ko chain ek aan nahin

tar dekh ke meri aankhon ko ye baat sunata hai hans kar

hain kahte jis ko chah miyan wo mushkil hai aasan nahin

dil phans kar us ki zulfon mein tadbir rihai ki mat kar

kab chhuTa us ke dam se tu wo dana hai nadan nahin