din ka lawa pite pite aaKHir jalne lagta hai

din kā laavā piite piite āḳhir jalne lagtā hai

hote hote shaam samundar roz ubalne lagtā hai

zabt dhuāñ hone lagtā hai angāroñ kī bārish meñ

phuul sā lahja bhī uktā kar aag ugalne lagtā hai

tā'bīroñ ke chehre dekh ke vahshat hone lagtī hai

niiñd meñ koī Dar kar apne ḳhvāb kuchalne lagtā hai

ik chehra aaḌe aa jaatā hai marne kī ḳhvāhish ke

us ko dekh ke jiine kā armān machalne lagtā hai

mushkil ye hai vaqt kī qīmat tab pahchānī jaatī hai

jab hāthoñ se lamha lamha vaqt phisalne lagtā hai

ye bhī hotā hai ġham ke mafhūm badalte jaate haiñ

yuuñ bhī hotā hai ashkoñ kā rang badalne lagtā hai

nam jhoñke namkīn havā ke jism meñ ghulte jaate haiñ

patthar kaisā bhī ho āḳhir-kār pighalne lagtā hai

buuñd ko dariyā meñ kho denā itnā bhī āsān nahīñ

madhoshī tak aate aate hosh sañbhalne lagtā hai

din ka lawa pite pite aaKHir jalne lagta hai

hote hote sham samundar roz ubalne lagta hai

zabt dhuan hone lagta hai angaron ki barish mein

phul sa lahja bhi ukta kar aag ugalne lagta hai

ta'biron ke chehre dekh ke wahshat hone lagti hai

nind mein koi Dar kar apne KHwab kuchalne lagta hai

ek chehra aaDe aa jata hai marne ki KHwahish ke

us ko dekh ke jine ka arman machalne lagta hai

mushkil ye hai waqt ki qimat tab pahchani jati hai

jab hathon se lamha lamha waqt phisalne lagta hai

ye bhi hota hai gham ke mafhum badalte jate hain

yun bhi hota hai ashkon ka rang badalne lagta hai

nam jhonke namkin hawa ke jism mein ghulte jate hain

patthar kaisa bhi ho aaKHir-kar pighalne lagta hai

bund ko dariya mein kho dena itna bhi aasan nahin

madhoshi tak aate aate hosh sanbhalne lagta hai