din ke sunahre KHwab se nikla nahin

din ke sunahre ḳhvāb se niklā nahīñ

muflis kabhī girdāb se niklā nahīñ

āh-o-fuġhāñ kā shor phir is ke sivā

kuchh bhī dil-e-betāb se niklā nahīñ

vāqif kahāñ vo dard kī poshāk se

jo atlas-o-kamḳhvāb se niklā nahīñ

merī sadā par ġhair to pahuñche magar

ik pal mire ahbāb se niklā nahīñ

garche nahīñ hai tazkira terā magar

tū zindagī ke baab se niklā nahīñ

vo lafz ke asrār ko jānegā kab

shā'ir abhī e'rāb se niklā nahīñ

paltā hai ye dariyā ke siine meñ 'valīd'

motī kabhī tālāb se niklā nahīñ

din ke sunahre KHwab se nikla nahin

muflis kabhi girdab se nikla nahin

aah-o-fughan ka shor phir is ke siwa

kuchh bhi dil-e-betab se nikla nahin

waqif kahan wo dard ki poshak se

jo atlas-o-kamKHwab se nikla nahin

meri sada par ghair to pahunche magar

ek pal mere ahbab se nikla nahin

garche nahin hai tazkira tera magar

tu zindagi ke bab se nikla nahin

wo lafz ke asrar ko jaanega kab

sha'ir abhi e'rab se nikla nahin

palta hai ye dariya ke sine mein 'walid'

moti kabhi talab se nikla nahin