diwane ko koi diwana mila hai

divāne ko koī divānā milā hai

ki sab kah rahe haiñ ḳhazānā milā hai

dhadhaktī pahar meñ chalā.e haiñ jab hal

tabhī aap logoñ ko khānā milā hai

kisānoñ kī mehnat ko kyā jaano tum log

binā kuchh kiye tum ko daana milā hai

pasīne kī roTī nahīñ jānte haiñ

navāboñ kā jin ko gharānā milā hai

use kyā zarūrat bhalā naukrī kī

virāsat meñ jis ko ḳhazānā milā hai

safar meñ musalsal guzāre haiñ din tab

hameñ aaj manzar suhānā milā hai

tirī chāl-bāzī na chal pā.egī ab

tujhe ham-safar ab siyānā milā hai

nayā kuchh talāsho na kamre meñ mere

mujhe hisse meñ ghar purānā milā hai

kiye the kisī ne ka.ī vā'de jis meñ

hameñ aaj ḳhat vo purānā milā hai

kareñ kyoñ nasheman charāġhoñ se raushan

jab andhoñ kā ham ko gharānā milā hai

diwane ko koi diwana mila hai

ki sab kah rahe hain KHazana mila hai

dhadhakti pahar mein chalae hain jab hal

tabhi aap logon ko khana mila hai

kisanon ki mehnat ko kya jaano tum log

bina kuchh kiye tum ko dana mila hai

pasine ki roTi nahin jaante hain

nawabon ka jin ko gharana mila hai

use kya zarurat bhala naukri ki

wirasat mein jis ko KHazana mila hai

safar mein musalsal guzare hain din tab

hamein aaj manzar suhana mila hai

teri chaal-bazi na chal paegi ab

tujhe ham-safar ab siyana mila hai

naya kuchh talasho na kamre mein mere

mujhe hisse mein ghar purana mila hai

kiye the kisi ne kai wa'de jis mein

hamein aaj KHat wo purana mila hai

karen kyon nasheman charaghon se raushan

jab andhon ka hum ko gharana mila hai