diya jalta na tha to sham bhi hoti nahin thi

diyā jaltā na thā to shaam bhī hotī nahīñ thī

vahī rahtī thī ḳhāmoshī na.ī hotī nahīñ thī

achānak misra’-e-jāñ se barāmad hone vaale

kahāñ hotā thā tū jab shā'irī hotī nahīñ thī

ham aisī raushnī meñ rah chuke haiñ jo sarāsar

tumhārī hotī thī par tum ne kī hotī nahīñ thī

kaho to guftugū sunvā.ūñ tum ko un dinoñ kī

hamāre darmiyāñ jab baat bhī hotī nahīñ thī

hañsī hotī thī pur karne ko girye kī jagah bhī

hañsī hotī thī yā shāyad hañsī hotī nahīñ thī

dikhānā paḌtā thā sho'la ise jab tū nahīñ thā

diye ko dekhne se raushnī hotī nahīñ thī

gharoñ se ho ke aate jaate the ham apne ghar meñ

galī kā pūchhte kyā ho galī hotī nahīñ thī

diya jalta na tha to sham bhi hoti nahin thi

wahi rahti thi KHamoshi nai hoti nahin thi

achanak misra’-e-jaan se baramad hone wale

kahan hota tha tu jab sha'iri hoti nahin thi

hum aisi raushni mein rah chuke hain jo sarasar

tumhaari hoti thi par tum ne ki hoti nahin thi

kaho to guftugu sunwaun tum ko un dinon ki

hamare darmiyan jab baat bhi hoti nahin thi

hansi hoti thi pur karne ko girye ki jagah bhi

hansi hoti thi ya shayad hansi hoti nahin thi

dikhana paDta tha sho'la ise jab tu nahin tha

diye ko dekhne se raushni hoti nahin thi

gharon se ho ke aate jate the hum apne ghar mein

gali ka puchhte kya ho gali hoti nahin thi