دو گھڑی بیٹھ مرے یار کہاں جاتا ہے

دو گھڑی بیٹھ مرے یار کہاں جاتا ہے

مجھ کو تجھ سے ہے سروکار کہاں جاتا ہے

باندھ کر پاؤں سے رفتار کہاں جاتا ہے

بہتے پانی میں یہ کہسار کہاں جاتا ہے

خواب کی مستی ہمیں کھینچے لئے جاتی ہے

اس گلی میں کوئی بیدار کہاں جاتا ہے

دھوپ بر دوش مجھے دیکھ کے اس رستے پر

پوچھتی ہے صف اشجار کہاں جاتا ہے

یہ جو پیکر ہے مرا جائے اماں ہے تیری

آ پلٹ آ مرے پندار کہاں جاتا ہے

جب کہانی سے نکل جاتا ہے کردار کوئی

کسے معلوم وہ کردار کہاں جاتا ہے

ماند دل کی اسے اک بار نظر آ جائے

پھر یہ تنہائی کا خوں خوار کہاں جاتا ہے

ہاں یہی بستی ہے ہم چاک گریبانوں کی

آ یہاں بیٹھ رفو کار کہاں جاتا ہے