du’a-e-nim-shabi ke asar mein zinda hun

du’ā-e-nīm-shabī ke asar meñ zinda huuñ

madār-e-zīst ke zād-e-safar meñ zinda huuñ

likhā hai nāma-e-dil bhī ba-nām-e-dar-ba-darī

huuñ kis dayār meñ kis ke nagar meñ zinda huuñ

sahīfa yaad kā juzdān meñ rakhā to khulā

maiñ aaj bhī unhī shām-o-sahar meñ zinda huuñ

nahīñ ḳhabar ki kahāñ kaise ziist kar guzrī

maiñ kin du'āoñ ke bāb-e-asar meñ zinda huuñ

hazār tohmat-e-pindār-e-zāt sah kar bhī

jahāñ meñ apne hī kār-e-hunar meñ zinda huuñ

darūn-e-qalb añdherā fuzūñ hai lekin maiñ

charāġh ban ke na.ī rah-guzar meñ zinda huuñ

mire vujūd kī sab kirchiyāñ sadā hoñgī

ki 'aks ban ke fan-e-shīsha-gar meñ zinda huuñ

ye fikr-o-fahm 'ġhazal' mere musta'ār nahīñ

maiñ apnī zaat ke 'aib-o-hunar meñ zinda huuñ

du’a-e-nim-shabi ke asar mein zinda hun

madar-e-zist ke zad-e-safar mein zinda hun

likha hai nama-e-dil bhi ba-nam-e-dar-ba-dari

hun kis dayar mein kis ke nagar mein zinda hun

sahifa yaad ka juzdan mein rakha to khula

main aaj bhi unhi sham-o-sahar mein zinda hun

nahin KHabar ki kahan kaise zist kar guzri

main kin du'aon ke bab-e-asar mein zinda hun

hazar tohmat-e-pindar-e-zat sah kar bhi

jahan mein apne hi kar-e-hunar mein zinda hun

darun-e-qalb andhera fuzun hai lekin main

charagh ban ke nai rah-guzar mein zinda hun

mere wujud ki sab kirchiyan sada hongi

ki 'aks ban ke fan-e-shisha-gar mein zinda hun

ye fikr-o-fahm 'ghazal' mere musta'ar nahin

main apni zat ke 'aib-o-hunar mein zinda hun