dukhati hai dil phir mohabbat kisi ki

dukhātī hai dil phir mohabbat kisī kī

ki āñkhoñ meñ phirtī hai sūrat kisī kī

na pūchho ye haiñ sikka-e-dāġh kis ke

ye daulat milī hai badaulat kisī kī

pur-armān ahbāb duniyā se uTThe

falak ne nikālī na hasrat kisī kī

ye aalam hai apnā ki kahtā hai aalam

ilāhī na ho aisī hālat kisī kī

ajab be-muravvat se paalā paḌā hai

kahāñ tak kare koī minnat kisī kī

uḌā le ga.ī sarv se qumriyoñ ko

qayāmat hai buuTā sī qāmat kis kī

maiñ is dil kā sāthī nahīñ āshiqī meñ

balā merī le sar par aafat kisī kī

nazar meñ haiñ yārān-e-rafta ke jalse

ḳhush aatī nahīñ mujh ko sohbat kisī kī

vo kyā din the ai dil tujhe yaad hai kuchh

vo merī ḳhushāmad vo naḳhvat kisī kī

bahut bad hai ai ishq sarkār tere

na izzat kisī kī na hurmat kisī kī

shikanje meñ rahtā hai dil aadmī kā

ḳhudā band rakkhe na hājat kisī kī

kahe mujh ko jo jis kā jī chāhe lekin

kabhī mujh se hogī na ġhībat kisī kī

abas 'bahr' marte ho tum har kisī par

mubārak nahīñ tum ko chāhat kisī kī

dukhati hai dil phir mohabbat kisi ki

ki aankhon mein phirti hai surat kisi ki

na puchho ye hain sikka-e-dagh kis ke

ye daulat mili hai badaulat kisi ki

pur-arman ahbab duniya se uTThe

falak ne nikali na hasrat kisi ki

ye aalam hai apna ki kahta hai aalam

ilahi na ho aisi haalat kisi ki

ajab be-murawwat se pala paDa hai

kahan tak kare koi minnat kisi ki

uDa le gai sarw se qumriyon ko

qayamat hai buTa si qamat kis ki

main is dil ka sathi nahin aashiqi mein

bala meri le sar par aafat kisi ki

nazar mein hain yaran-e-rafta ke jalse

KHush aati nahin mujh ko sohbat kisi ki

wo kya din the ai dil tujhe yaad hai kuchh

wo meri KHushamad wo naKHwat kisi ki

bahut bad hai ai ishq sarkar tere

na izzat kisi ki na hurmat kisi ki

shikanje mein rahta hai dil aadmi ka

KHuda band rakkhe na hajat kisi ki

kahe mujh ko jo jis ka ji chahe lekin

kabhi mujh se hogi na ghibat kisi ki

abas 'bahr' marte ho tum har kisi par

mubarak nahin tum ko chahat kisi ki