dukhon ka dasht aankhon ka samundar chhoD aaya hun

dukhoñ kā dasht āñkhoñ kā samundar chhoḌ aayā huuñ

jo ghar meñ lā na sakta thā vo bāhar chhoḌ aayā huuñ

tum aglī bārishoñ ke baa'd jākar dekhnā pyāre

tumhārā naam dīvāroñ pe likh kar chhoḌ aayā huuñ

mohabbat kī hai us ghar meñ rihā.ish to nahīñ kī hai

abhī to sirf darvāze pe bistar chhoḌ aayā huuñ

tirī bāñhoñ meñ aa kar bhī yahī mahsūs hotā hai

ki ḳhud ko vaqt ke rahm-o-karam par chhoḌ aayā huuñ

abhī kuchh der meñ phailegī ḳhushbū saarī bastī meñ

vahāñ ke ik darīche meñ gul-e-tar chhoḌ aaya huuñ

ḳhudā-na-ḳhvāsta maiñ bhī agar banbās luuñ 'tābish'

vahāñ kis ko batā.ūñgā bharā ghar chhoḌ aaya huuñ

dukhon ka dasht aankhon ka samundar chhoD aaya hun

jo ghar mein la na sakta tha wo bahar chhoD aaya hun

tum agli barishon ke ba'd jakar dekhna pyare

tumhaara nam diwaron pe likh kar chhoD aaya hun

mohabbat ki hai us ghar mein rihaish to nahin ki hai

abhi to sirf darwaze pe bistar chhoD aaya hun

teri banhon mein aa kar bhi yahi mahsus hota hai

ki KHud ko waqt ke rahm-o-karam par chhoD aaya hun

abhi kuchh der mein phailegi KHushbu sari basti mein

wahan ke ek dariche mein gul-e-tar chhoD aaya hun

KHuda-na-KHwasta main bhi agar banbas lun 'tabish'

wahan kis ko bataunga bhara ghar chhoD aaya hun