duniya-e-dil sajaun agar mera bas chale

duniyā-e-dil sajā.ūñ agar merā bas chale

apnā tumheñ banā.ūñ agar merā bas chale

hai koī baat jis se huuñ vārafta-e-ḳhayāl

tum ko na bhuul jā.ūñ agar merā bas chale

ye ajnabī hayāt ye paiham shikast-e-dil

har shai ko bhuul jā.ūñ agar merā bas chale

har chand arz-e-shauq hai pāband-e-ehtiyāt

sab kuchh tumheñ sunā.ūñ agar merā bas chale

dar-asl ik azāb-e-musalsal hai zindagī

duniyā se lauT jā.ūñ agar merā bas chale

merī vafā ko aap ne to aazmā liyā

maiñ bhī to āzmā.ūñ agar merā bas chale

merī tabāhiyoñ pe haiñ ahbāb ḳhanda-zan

maiñ ḳhud na muskurā.ūñ agar merā bas chale

vaj.h-e-sukūn-e-zīst hai 'rif.at' fareb-e-dost

phir se fareb khā.ūñ agar merā bas chale

duniya-e-dil sajaun agar mera bas chale

apna tumhein banaun agar mera bas chale

hai koi baat jis se hun warafta-e-KHayal

tum ko na bhul jaun agar mera bas chale

ye ajnabi hayat ye paiham shikast-e-dil

har shai ko bhul jaun agar mera bas chale

har chand arz-e-shauq hai paband-e-ehtiyat

sab kuchh tumhein sunaun agar mera bas chale

dar-asl ek azab-e-musalsal hai zindagi

duniya se lauT jaun agar mera bas chale

meri wafa ko aap ne to aazma liya

main bhi to aazmaun agar mera bas chale

meri tabahiyon pe hain ahbab KHanda-zan

main KHud na muskuraun agar mera bas chale

wajh-e-sukun-e-zist hai 'rifat' fareb-e-dost

phir se fareb khaun agar mera bas chale