duniyā kā na uqbā kā koī ġham nahīñ sahte
jo aap ke ho jaate haiñ apne nahīñ rahte
ro le abhī kuchh aur ġhanīmat hai ye ronā
ban jaate haiñ vo zahr jo aañsū nahīñ bahte
ab koī na.ī chaal chal ai gardish-e-duniyā
ham roz ke fitne ko qayāmat nahīñ kahte
sab pūchho guzartī hai jo ham par vo na pūchho
dil rotā hai aur aañkh se aañsū nahīñ bahte
aag aur dhuāñ aur havas aur hai ishq aur
har hausla-e-dil ko mohabbat nahīñ kahte
is daur meñ karvaT na badal jazba-e-ehsās
haiñ chain se jo hosh meñ apne nahīñ rahte
hairān haiñ ab jaa.eñ kahāñ DhūñDne tum ko
ā.īna-e-idrāk meñ bhī tum nahīñ rahte
dīdār ke tālib to 'sirāj' ab bhī haiñ lekin
jalnā to baḌā kaam hai aañch ik nahīñ sahte
duniya ka na uqba ka koi gham nahin sahte
jo aap ke ho jate hain apne nahin rahte
ro le abhi kuchh aur ghanimat hai ye rona
ban jate hain wo zahr jo aansu nahin bahte
ab koi nai chaal chal ai gardish-e-duniya
hum roz ke fitne ko qayamat nahin kahte
sab puchho guzarti hai jo hum par wo na puchho
dil rota hai aur aankh se aansu nahin bahte
aag aur dhuan aur hawas aur hai ishq aur
har hausla-e-dil ko mohabbat nahin kahte
is daur mein karwaT na badal jazba-e-ehsas
hain chain se jo hosh mein apne nahin rahte
hairan hain ab jaen kahan DhunDne tum ko
aaina-e-idrak mein bhi tum nahin rahte
didar ke talib to 'siraj' ab bhi hain lekin
jalna to baDa kaam hai aanch ek nahin sahte
Source:
Shola-e-Aawaz (Pg. e-189 p-188)
-
Author:
Siraj Lakhnavi
-
- Edition: 1920
- Publisher: Nizami Press, Lucknow
- Year of Publication: 1920
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.