duniya ko tere dard dikhae nahin jate

duniyā ko tire dard dikhā.e nahīñ jaate

aur hijr meñ ye qisse chhupā.e nahīñ jaate

hijrat hai agar ḳhuun meñ shāmil to khuleñge

ādāb-e-safar-dārī sikhā.e nahīñ jaate

kuchh phuul haiñ aise ki khilā.e nahīñ khilte

kuchh zaḳhm haiñ aise ki ye jaa.e nahīñ jaate

sūkhī huī koñpal se hai ḳhushbū kī tamanna

murjhā.e hue phūloñ ke saa.e nahīñ jaate

auroñ ke kiye vā'de bhulā detā huuñ aksar

par mujh se tire vā'de bhulā.e nahīñ jaate

kuchh dard tire saath nahīñ baañT sakā maiñ

kuchh giit tire sāmne gaa.e nahīñ jaate

duniya ko tere dard dikhae nahin jate

aur hijr mein ye qisse chhupae nahin jate

hijrat hai agar KHun mein shamil to khulenge

aadab-e-safar-dari sikhae nahin jate

kuchh phul hain aise ki khilae nahin khilte

kuchh zaKHm hain aise ki ye jae nahin jate

sukhi hui konpal se hai KHushbu ki tamanna

murjhae hue phulon ke sae nahin jate

auron ke kiye wa'de bhula deta hun aksar

par mujh se tere wa'de bhulae nahin jate

kuchh dard tere sath nahin banT saka main

kuchh git tere samne gae nahin jate