duniya na chahiye tujhe uqba na chahiye

duniyā na chāhiye tujhe uqbā na chāhiye

aur dil ke be-shi'ār tamanna na chāhiye

maare hai sar-ba-sang to phūTe hai jū-e-shīr

kohkan ye kaun hai jise tesha na chāhiye

josh-e-junūñ meñ jaañ se guzarnā sahī magar

josh-e-junūñ meñ had se guzarnā na chāhiye

kartā hai kaun husn kā duniyā meñ haq adā

vāraftagī ba-tarz-e-zuleḳhā na chāhiye

rindān-e-mai-kada ko mubārak balā-kashī

ham ko sharāb-e-jalva-e-jānāna chāhiye

gardish meñ sāġhar-o-mai-o-mīnā agar nahīñ

'e'jāz' lab pe nā’ra-e-mastāna chāhiye

duniya na chahiye tujhe uqba na chahiye

aur dil ke be-shi'ar tamanna na chahiye

mare hai sar-ba-sang to phuTe hai ju-e-shir

kohkan ye kaun hai jise tesha na chahiye

josh-e-junun mein jaan se guzarna sahi magar

josh-e-junun mein had se guzarna na chahiye

karta hai kaun husn ka duniya mein haq ada

waraftagi ba-tarz-e-zuleKHa na chahiye

rindan-e-mai-kada ko mubarak bala-kashi

hum ko sharab-e-jalwa-e-jaanana chahiye

gardish mein saghar-o-mai-o-mina agar nahin

'e'jaz' lab pe na’ra-e-mastana chahiye