duniya ne jab bhi rah mein kanTe bichhae hain

duniyā ne jab bhī raah meñ kāñTe bichhā.e haiñ

kāñToñ pe chalne vaale bahut yaad aa.e haiñ

nādīda 'aks dil-zadagāñ ko dikhā.e haiñ

ā.īne TuuT kar bhī bahut kaam aa.e haiñ

chhalkī kahīñ sharāb kahīñ ġhunche khil ga.e

kyā kyā tirī nigāh ne jaadū jagā.e haiñ

ādāb ziist karne ke ġhunchoñ se sīkhiye

mausam ke zaḳhm khaa.e magar muskurā.e haiñ

lau de rahī thī jin kī tamanna hayāt meñ

ab ke vahī charāġh havā ne bujhā.e haiñ

ik baar vo nigāh uThī phir tamām 'umr

ham apnī ḳhvāhishoñ ke lahū meñ nahā.e haiñ

tārīḳh ko batā.egā kal kaun phir 'sirāj'

ye diip ḳhud bujhe ki havā ne bujhā.e haiñ

duniya ne jab bhi rah mein kanTe bichhae hain

kanTon pe chalne wale bahut yaad aae hain

nadida 'aks dil-zadagan ko dikhae hain

aaine TuT kar bhi bahut kaam aae hain

chhalki kahin sharab kahin ghunche khil gae

kya kya teri nigah ne jadu jagae hain

aadab zist karne ke ghunchon se sikhiye

mausam ke zaKHm khae magar muskurae hain

lau de rahi thi jin ki tamanna hayat mein

ab ke wahi charagh hawa ne bujhae hain

ek bar wo nigah uThi phir tamam 'umr

hum apni KHwahishon ke lahu mein nahae hain

tariKH ko bataega kal kaun phir 'siraj'

ye dip KHud bujhe ki hawa ne bujhae hain