duniya se munh moD liya hai

duniyā se muñh moḌ liyā hai

tujh se naata toḌ liyā hai

nazr-e-mohabbat pesh kareñge

dil kā shīsha toḌ liyā hai

jis ko nahīñ hai tujh pe bharosa

us ne muqaddar phoḌ liyā hai

kyoñ na rahe ik kaif kā 'ālam

saaqī se dil joḌ liyā hai

phir vo jān-e-ārzū aayā

phir dil ne ik moḌ liyā hai

sāz-e-nafas kā har ik naġhma

yaad se terī joḌ liyā hai

Dūbne vaalī har kashtī ne

sāhil se ruḳh moḌ liyā hai

'ishq meñ apne dil kā ta'alluq

tere ġham se joḌ liyā hai

'ishq kī hai ye kaun sī manzil

ḳhud se bhī muñh moḌ liyā hai

terī mohabbat meñ 'sādiq' ne

sab se rishta toḌ liyā hai

duniya se munh moD liya hai

tujh se nata toD liya hai

nazr-e-mohabbat pesh karenge

dil ka shisha toD liya hai

jis ko nahin hai tujh pe bharosa

us ne muqaddar phoD liya hai

kyon na rahe ek kaif ka 'alam

saqi se dil joD liya hai

phir wo jaan-e-arzu aaya

phir dil ne ek moD liya hai

saz-e-nafas ka har ek naghma

yaad se teri joD liya hai

Dubne wali har kashti ne

sahil se ruKH moD liya hai

'ishq mein apne dil ka ta'alluq

tere gham se joD liya hai

'ishq ki hai ye kaun si manzil

KHud se bhi munh moD liya hai

teri mohabbat mein 'sadiq' ne

sab se rishta toD liya hai