دنیا سے منہ موڑ لیا ہے

دنیا سے منہ موڑ لیا ہے

تجھ سے ناطہ توڑ لیا ہے

نذر محبت پیش کریں گے

دل کا شیشہ توڑ لیا ہے

جس کو نہیں ہے تجھ پہ بھروسہ

اس نے مقدر پھوڑ لیا ہے

کیوں نہ رہے اک کیف کا عالم

ساقی سے دل جوڑ لیا ہے

پھر وہ جان آرزو آیا

پھر دل نے اک موڑ لیا ہے

ساز نفس کا ہر اک نغمہ

یاد سے تیری جوڑ لیا ہے

ڈوبنے والی ہر کشتی نے

ساحل سے رخ موڑ لیا ہے

عشق میں اپنے دل کا تعلق

تیرے غم سے جوڑ لیا ہے

عشق کی ہے یہ کون سی منزل

خود سے بھی منہ موڑ لیا ہے

تیری محبت میں صادقؔ نے

سب سے رشتہ توڑ لیا ہے