dupaTTa wo gulnar dikhla gae

dupaTTā vo gulnār dikhlā ga.e

na.e sur se phir aag bhaḌkā ga.e

tumhārī zidoñ se ham uktā ga.e

kisī roz sun lenā kuchh khā ga.e

hamārī fuġhāñ se na maano burā

kahāñ tak kareñ zabt ghabrā ga.e

qafas se chhuTe kin dinoñ yā-nasīb

ki patte bhī phūloñ ke murjhā ga.e

ga.e mere dushman ke phūloñ meñ vo

mujhe ġham ke kāñToñ meñ uljhā ga.e

hamāre gul-andām kā hai ye rañg

zarā dhuup meñ nikle sañvlā ga.e

ye sar choT furqat ke sadme rahī

bahut kāsa-e-sar meñ baal aa ga.e

lahad meñ gire jab huā sar safed

paḌī dhuup aisī ki teyorā ga.e

na pahuñchī chaman tak ḳhizāñ aa ga.ī

diloñ ke kañval khil ke kumhlā ga.e

kisī kī vo zulfeñ jo yaad aa ga.iiñ

mire siine par saañp lahrā ga.e

falak abr kī tarah phaT jā.egā

mire naale jis roz Takrā ga.e

har ik baat kī tah samajhne lage

bahut duur ho ham tumheñ pā ga.e

huā dhuup meñ bhī na kam husn-e-yār

kanhayyā bane vo jo sañvlā ga.e

na joban ubharne diyā naaz ne

dupaTTā jo sarkā to sharmā ga.e

miyāñ-'bahr' kyuuñ chupke chupke ho aaj

jo mehmān aa.e the vo kyā ga.e

dupaTTa wo gulnar dikhla gae

nae sur se phir aag bhaDka gae

tumhaari zidon se hum ukta gae

kisi roz sun lena kuchh kha gae

hamari fughan se na mano bura

kahan tak karen zabt ghabra gae

qafas se chhuTe kin dinon ya-nasib

ki patte bhi phulon ke murjha gae

gae mere dushman ke phulon mein wo

mujhe gham ke kanTon mein uljha gae

hamare gul-andam ka hai ye rang

zara dhup mein nikle sanwla gae

ye sar choT furqat ke sadme rahi

bahut kasa-e-sar mein baal aa gae

lahad mein gire jab hua sar safed

paDi dhup aisi ki teyora gae

na pahunchi chaman tak KHizan aa gai

dilon ke kanwal khil ke kumhla gae

kisi ki wo zulfen jo yaad aa gain

mere sine par sanp lahra gae

falak abr ki tarah phaT jaega

mere nale jis roz Takra gae

har ek baat ki tah samajhne lage

bahut dur ho hum tumhein pa gae

hua dhup mein bhi na kam husn-e-yar

kanhayya bane wo jo sanwla gae

na joban ubharne diya naz ne

dupaTTa jo sarka to sharma gae

miyan-'bahr' kyun chupke chupke ho aaj

jo mehman aae the wo kya gae