dushman bhi kabhi dost se achchha nahin lagta

dushman bhī kabhī dost se achchhā nahīñ lagtā

sach boliye kyā aap ko aisā nahīñ lagtā

kahne ko to apnoñ kī yahāñ bhiiḌ hai lekin

is bhiiḌ meñ ik shaḳhs bhī apnā nahīñ lagtā

nas nas meñ basā lī hai tire pyaar kī ḳhushbū

tū mujh se bahut duur hai aisā nahīñ lagtā

charchā jo huā tark-e-ta'alluq kā jahāñ meñ

kyā is meñ qusūr aap ko apnā nahīñ lagtā

dā'vā to vo kartā hai masīhā.ī kā lekin

kirdār-o-‘amal se vo masīhā nahīñ lagtā

chāloñ meñ turup chaal bhī ik chaal hai yaaro

nahle pe har ik baar hī dahlā nahīñ lagtā

kyā karte 'salīm' us se jafāoñ kā gila ham

jo qaul-o-'amal meñ kabhī sachchā nahīñ lagtā

dushman bhi kabhi dost se achchha nahin lagta

sach boliye kya aap ko aisa nahin lagta

kahne ko to apnon ki yahan bhiD hai lekin

is bhiD mein ek shaKHs bhi apna nahin lagta

nas nas mein basa li hai tere pyar ki KHushbu

tu mujh se bahut dur hai aisa nahin lagta

charcha jo hua tark-e-ta'alluq ka jahan mein

kya is mein qusur aap ko apna nahin lagta

da'wa to wo karta hai masihai ka lekin

kirdar-o-‘amal se wo masiha nahin lagta

chaalon mein turup chaal bhi ek chaal hai yaro

nahle pe har ek bar hi dahla nahin lagta

kya karte 'salim' us se jafaon ka gila hum

jo qaul-o-'amal mein kabhi sachcha nahin lagta