دشمن بھی کبھی دوست سے اچھا نہیں لگتا

دشمن بھی کبھی دوست سے اچھا نہیں لگتا

سچ بولئے کیا آپ کو ایسا نہیں لگتا

کہنے کو تو اپنوں کی یہاں بھیڑ ہے لیکن

اس بھیڑ میں اک شخص بھی اپنا نہیں لگتا

نس نس میں بسا لی ہے ترے پیار کی خوشبو

تو مجھ سے بہت دور ہے ایسا نہیں لگتا

چرچا جو ہوا ترک تعلق کا جہاں میں

کیا اس میں قصور آپ کو اپنا نہیں لگتا

دعویٰ تو وہ کرتا ہے مسیحائی کا لیکن

کردار و عمل سے وہ مسیحا نہیں لگتا

چالوں میں ترپ چال بھی اک چال ہے یارو

نہلے پہ ہر اک بار ہی دہلا نہیں لگتا

کیا کرتے سلیمؔ اس سے جفاؤں کا گلہ ہم

جو قول و عمل میں کبھی سچا نہیں لگتا