dushman-e-jaan hai na ghaarat-gar-e-din hai koi

dushman-e-jāñ hai na ġhārat-gar-e-dīñ hai koī

phir bhī ārām se duniyā meñ nahīñ hai koī

barq ke saa.e meñ karte haiñ nasheman ta.amīr

ham sā dīvāna bhī duniyā meñ nahīñ hai koī

ham bhī āzād sahī aap bhī āzād sahī

nāsiya-sā.ī se āzād nahīñ hai koī

jo paḌe vo na saheñ to kareñ kis se fariyād

āsmāñ apnā hai yā apnī zamīñ hai koī

jaur-e-ayyām se bardashta-ḳhātir na huā

is yaqīñ par ki rag-e-jāñ se qarīñ hai koī

kaisā andher hai saaqī ye tirī mahfil meñ

kisī aa.iin kā pāband nahīñ hai koī

ab haram se koī nisbat na sanam-ḳhāne se

ham sā āzād bhī duniyā meñ kahīñ hai koī

koī to baat hai sāhil se jo uThThā tūfāñ

nā-ḳhudā kī to siyāsat ye nahīñ hai koī

be-vafā se mujhe ummīd-e-vafā hai 'tālib'

ḳhud-farebī hai ki ye husn-e-yaqīñ hai koī

ab kis ummīd pe ye āh-o-fuġhāñ ai 'tālib'

ab to be-dād pe maa.il bhī nahīñ hai koī

dushman-e-jaan hai na ghaarat-gar-e-din hai koi

phir bhi aaram se duniya mein nahin hai koi

barq ke sae mein karte hain nasheman tamir

hum sa diwana bhi duniya mein nahin hai koi

hum bhi aazad sahi aap bhi aazad sahi

nasiya-sai se aazad nahin hai koi

jo paDe wo na sahen to karen kis se fariyaad

aasman apna hai ya apni zamin hai koi

jaur-e-ayyam se bardashta-KHatir na hua

is yaqin par ki rag-e-jaan se qarin hai koi

kaisa andher hai saqi ye teri mahfil mein

kisi aain ka paband nahin hai koi

ab haram se koi nisbat na sanam-KHane se

hum sa aazad bhi duniya mein kahin hai koi

koi to baat hai sahil se jo uThTha tufan

na-KHuda ki to siyasat ye nahin hai koi

be-wafa se mujhe ummid-e-wafa hai 'talib'

KHud-farebi hai ki ye husn-e-yaqin hai koi

ab kis ummid pe ye aah-o-fughan ai 'talib'

ab to be-dad pe mail bhi nahin hai koi