Dubne walo hawaon ka hunar kaisa laga

Dūbne vaalo havāoñ kā hunar kaisā lagā

ye kinārā ye samundar ye bhañvar kaisā lagā

poñchhte jā.iye dāman se lahū māthe kā

sochte jā.iye dīvār ko sar kaisā lagā

haT ga.ī chhāñv magar log vahīñ baiThe haiñ

dasht kī dhuup meñ jaane vo shajar kaisā lagā

dar-o-dīvār haiñ maiñ huuñ mirī tanhā.ī hai

chāñdnī raat se pūchho mirā ghar kaisā lagā

is se pahle kabhī poñchhe the kisī ne aañsū

un kā dāman tujhe ai dīda-e-tar kaisā lagā

sahl thiiñ marhala-e-tark-e-vafā tak rāheñ

is se aage koī pūchhe ki safar kaisā lagā

aañkh se dekh liyā tark-e-vatan kā manzar

ghar jahāñ chhoḌ ga.e the vo khañDar kaisā lagā

vo mujhe sun ke baḌī der se chup hai 'qaisar'

jaane us ko mirī ġhazloñ kā hunar kaisā lagā

Dubne walo hawaon ka hunar kaisa laga

ye kinara ye samundar ye bhanwar kaisa laga

ponchhte jaiye daman se lahu mathe ka

sochte jaiye diwar ko sar kaisa laga

haT gai chhanw magar log wahin baiThe hain

dasht ki dhup mein jaane wo shajar kaisa laga

dar-o-diwar hain main hun meri tanhai hai

chandni raat se puchho mera ghar kaisa laga

is se pahle kabhi ponchhe the kisi ne aansu

un ka daman tujhe ai dida-e-tar kaisa laga

sahl thin marhala-e-tark-e-wafa tak rahen

is se aage koi puchhe ki safar kaisa laga

aankh se dekh liya tark-e-watan ka manzar

ghar jahan chhoD gae the wo khanDar kaisa laga

wo mujhe sun ke baDi der se chup hai 'qaisar'

jaane us ko meri ghazlon ka hunar kaisa laga