Dubte ne kiye kya kya na jatan pani mein

Dūbte ne kiye kyā kyā na jatan paanī meñ

tū ne dekhā nahīñ ram kartā hiran paanī meñ

jān-e-ḳhasta ko hai darkār tirā chāh-e-zaqan

jā ke utregī ye sadiyoñ kī thakan paanī meñ

mo'jize pūchh na jo baḳhshe ga.e haiñ is ko

'ishq vo shai ki lagā de jo agan paanī meñ

is qadar ashk bahā.e sar-e-dariyā mat pūchh

ham ne shāmil kiye jo gang-o-jaman paanī meñ

kyā kahūñ kis tarah us ne kiyā ġharqāb mujhe

bāñdh kar pheñkā gayā sang-o-rasan paanī meñ

aise karvaT pe liye jaatī haiñ karvaT lahreñ

jaise lahrātī ho bistar kī shikan paanī meñ

ho ke ġharqāb tumheñ kitnī suhūlat de dī

ġhusl darkār na darkār kafan paanī meñ

raaz poshīda haiñ dil meñ jo tire khul jaa.eñ

mai kisī din jo milā duuñ maiñ sajan paanī meñ

aa ki is jhiil ko ham aarsī mus.haf kar leñ

'aks-dar-'aks hī ho jaa.e milan paanī meñ

lab-e-dariyā jo tire 'ishq meñ dhammāl karūñ

mere ghuñghrū kī rache chhan chhananan paanī meñ

hai kisī yaad kī talḳhī mire ashkoñ meñ zarūr

varna is darja chubhan aisī jalan paanī meñ

tū hai pairāk bajā par tujhe mā'lūm nahīñ

tairtoñ ko jo Dubone kā hai fan paanī meñ

harf lahroñ pe kañval ban ke haiñ khilte 'nasrīn'

likh ke kāġhaz pe bahātī huuñ suḳhan paanī meñ

Dubte ne kiye kya kya na jatan pani mein

tu ne dekha nahin ram karta hiran pani mein

jaan-e-KHasta ko hai darkar tera chah-e-zaqan

ja ke utregi ye sadiyon ki thakan pani mein

mo'jize puchh na jo baKHshe gae hain is ko

'ishq wo shai ki laga de jo agan pani mein

is qadar ashk bahae sar-e-dariya mat puchh

hum ne shamil kiye jo gang-o-jaman pani mein

kya kahun kis tarah us ne kiya gharqab mujhe

bandh kar phenka gaya sang-o-rasan pani mein

aise karwaT pe liye jati hain karwaT lahren

jaise lahraati ho bistar ki shikan pani mein

ho ke gharqab tumhein kitni suhulat de di

ghusl darkar na darkar kafan pani mein

raaz poshida hain dil mein jo tere khul jaen

mai kisi din jo mila dun main sajan pani mein

aa ki is jhil ko hum aarsi mushaf kar len

'aks-dar-'aks hi ho jae milan pani mein

lab-e-dariya jo tere 'ishq mein dhammal karun

mere ghunghru ki rache chhan chhananan pani mein

hai kisi yaad ki talKHi mere ashkon mein zarur

warna is darja chubhan aisi jalan pani mein

tu hai pairak baja par tujhe ma'lum nahin

tairton ko jo Dubone ka hai fan pani mein

harf lahron pe kanwal ban ke hain khilte 'nasrin'

likh ke kaghaz pe bahati hun suKHan pani mein