Dubte suraj ka manzar wo suhani kashtiyan

Dūbte sūraj kā manzar vo suhānī kashtiyāñ

phir bulātī haiñ kisī ko bādbānī kashtiyāñ

ik ajab sailāb sā dil ke nihāñ-ḳhāne meñ thā

ret sāhil duur tak paanī hī paanī kashtiyāñ

mauj-e-dariyā ne kahā kyā sāhiloñ se kyā milā

kah ga.iiñ kal raat sab apnī kahānī kashtiyāñ

ḳhāmushī se Dūbne vaale hameñ kyā de ga.e

ek anjāne safar kī kuchh nishānī kashtiyāñ

ek din aisā bhī aayā halqa-e-girdāb meñ

kasmasā kar rah ga.iiñ ḳhvāboñ kī dhānī kashtiyāñ

aaj bhī ashkoñ ke is gahre samundar meñ 'shamīm'

tairtī phirtī haiñ yādoñ kī purānī kashtiyāñ

Dubte suraj ka manzar wo suhani kashtiyan

phir bulati hain kisi ko baadbani kashtiyan

ek ajab sailab sa dil ke nihan-KHane mein tha

ret sahil dur tak pani hi pani kashtiyan

mauj-e-dariya ne kaha kya sahilon se kya mila

kah gain kal raat sab apni kahani kashtiyan

KHamushi se Dubne wale hamein kya de gae

ek anjaane safar ki kuchh nishani kashtiyan

ek din aisa bhi aaya halqa-e-girdab mein

kasmasa kar rah gain KHwabon ki dhani kashtiyan

aaj bhi ashkon ke is gahre samundar mein 'shamim'

tairti phirti hain yaadon ki purani kashtiyan