dur tak phaila nahin dil ka dhuan achchha hua

duur tak phailā nahīñ dil kā dhuāñ achchhā huā

phir simaT aa.iiñ mujhī meñ āñdhiyāñ achchhā huā

rañg le aa.iiñ mirī mad.hoshiyāñ achchhā huā

hosh meñ aane lagā saarā jahāñ achchhā huā

kyā ġhazab hotā agar vo āzmātā zid mirī

jhuk gayā ḳhud hī zamīñ par āsmāñ achchhā huā

chaar pal the vasl ke do-chār ghaḌiyāñ pyaar kī

zindagī guzrī unhīñ ke darmiyāñ achchhā huā

har haqīqat mere ḳhvāboñ se hī Takrātī rahī

saath mere the ka.ī vahm-o-gumāñ achchhā huā

āñdhiyāñ aa.iiñ uThā kar le ga.iiñ sab bastiyāñ

maiñ ne ik dil meñ banāyā thā makāñ achchhā huā

dur tak phaila nahin dil ka dhuan achchha hua

phir simaT aain mujhi mein aandhiyan achchha hua

rang le aain meri madhoshiyan achchha hua

hosh mein aane laga sara jahan achchha hua

kya ghazab hota agar wo aazmata zid meri

jhuk gaya KHud hi zamin par aasman achchha hua

chaar pal the wasl ke do-chaar ghaDiyan pyar ki

zindagi guzri unhin ke darmiyan achchha hua

har haqiqat mere KHwabon se hi Takraati rahi

sath mere the kai wahm-o-guman achchha hua

aandhiyan aain uTha kar le gain sab bastiyan

main ne ek dil mein banaya tha makan achchha hua