dur tak rengte qadmon ke nishan pae hain

duur tak reñgte qadmoñ ke nishāñ paa.e haiñ

jab kabhī apne ta.āqub meñ nikal aa.e haiñ

zindagī apnī kashākash hī meñ ghir kar ubhrī

hoñge vo aur jo hālāt se ghabrā.e haiñ

kyā rahe yaad bhalā yūrish-e-afkār meñ ab

kitne patthar ġham-e-ayyām ne barsā.e haiñ

ham ne har zarra ko baḳhshī hai tabassum kī ziyā

ham hī phir nang-e-vafā dahr meñ kahlā.e haiñ

zindagī aa kabhī muḌ kar zarā dekheñ to sahī

kitne zaḳhmoñ ke qadam raah meñ chhoḌ aa.e haiñ

aks hī aks haiñ chehroñ ke nishāñ tak bhī nahīñ

haa.e kis shahr meñ ham log nikal aa.e haiñ

kitnā pur-haul hai ye dasht-e-vafā bhī 'at.har'

bārhā apnī hī āvāz se tharrā.e haiñ

dur tak rengte qadmon ke nishan pae hain

jab kabhi apne taaqub mein nikal aae hain

zindagi apni kashakash hi mein ghir kar ubhri

honge wo aur jo haalat se ghabrae hain

kya rahe yaad bhala yurish-e-afkar mein ab

kitne patthar gham-e-ayyam ne barsae hain

hum ne har zarra ko baKHshi hai tabassum ki ziya

hum hi phir nang-e-wafa dahr mein kahlae hain

zindagi aa kabhi muD kar zara dekhen to sahi

kitne zaKHmon ke qadam rah mein chhoD aae hain

aks hi aks hain chehron ke nishan tak bhi nahin

hae kis shahr mein hum log nikal aae hain

kitna pur-haul hai ye dasht-e-wafa bhi 'athar'

barha apni hi aawaz se tharrae hain