ek aansu mein tere gham ka ahata karte

ek aañsū meñ tire ġham kā ahāta karte

'umr lag jā.egī is buuñd ko dariyā karte

'ishq meñ jaañ se guzarnā bhī kahāñ hai mushkil

jaan denī ho to 'āshiq nahīñ sochā karte

ek tū hī nazar aatā hai jidhar dekhtā huuñ

aur āñkheñ nahīñ thaktī haiñ tamāsha karte

tū ne ye ḳhitta-e-ḳhāshāk diyā thā maiñ ne

kar diyā ḳhuun pasīna ise duniyā karte

zindagī ne hameñ fursat hī nahīñ dī varna

sāmne tujh ko biThā baiTh ke dekhā karte

ham sazā-vār-e-tamāsha the hameñ dekhnā thā

apne hī qatl kā manzar thā magar kyā karte

ab yahī sochte rahte haiñ bichhaḌ kar tujh se

shāyad aise nahīñ hotā agar aisā karte

shahr ke log ab ilzām tumheñ dete haiñ

ḳhud bure ban ga.e 'āsim' use achchhā karte

ek aansu mein tere gham ka ahata karte

'umr lag jaegi is bund ko dariya karte

'ishq mein jaan se guzarna bhi kahan hai mushkil

jaan deni ho to 'ashiq nahin socha karte

ek tu hi nazar aata hai jidhar dekhta hun

aur aankhen nahin thakti hain tamasha karte

tu ne ye KHitta-e-KHashak diya tha main ne

kar diya KHun pasina ise duniya karte

zindagi ne hamein fursat hi nahin di warna

samne tujh ko biTha baiTh ke dekha karte

hum saza-war-e-tamasha the hamein dekhna tha

apne hi qatl ka manzar tha magar kya karte

ab yahi sochte rahte hain bichhaD kar tujh se

shayad aise nahin hota agar aisa karte

shahr ke log ab ilzam tumhein dete hain

KHud bure ban gae 'asim' use achchha karte