ek ajib rag hai ek ajib guftugu

ek ajiib raag hai ek ajiib guftugū

saat suroñ kī aag hai āThvīñ sur kī justujū

bujhte hue mire ḳhayāl jin meñ hazār-hā savāl

phir se bhaḌak ke ruuh meñ phail ga.e haiñ chār-sū

tīra-shabī pe sabr thā so vo kisī ko bhā gayā

aap hī aap chhā gayā ek sahāb-e-rañg-o-bū

hañstī huī ga.ī hai sub.h pyaar se aa rahī hai shaam

terī shabīh ban ga.ī vaqt kī gard hū-ba-hū

phir ye tamām silsila kyā hai kidhar ko jā.egā

merī talāsh dar-ba-dar terā gurez kū-ba-kū

ḳhūn-e-junūñ to jal gayā shauq kidhar nikal gayā

sust haiñ dil kī dhaḌkaneñ tez hai nabz-e-ārzū

terā mirā qusūr kyā ye to hai jabr-e-irtiqā

bas vo jo rabt ho gayā aap hī pā gayā numū

maiñ jo rahā huuñ be-suḳhan ye bhī hai ehtirām-e-fan

yaanī mujhe aziiz thī apnī ġhazal kī aabrū

ek ajib rag hai ek ajib guftugu

sat suron ki aag hai aaThwin sur ki justuju

bujhte hue mere KHayal jin mein hazar-ha sawal

phir se bhaDak ke ruh mein phail gae hain chaar-su

tira-shabi pe sabr tha so wo kisi ko bha gaya

aap hi aap chha gaya ek sahab-e-rang-o-bu

hansti hui gai hai subh pyar se aa rahi hai sham

teri shabih ban gai waqt ki gard hu-ba-hu

phir ye tamam silsila kya hai kidhar ko jaega

meri talash dar-ba-dar tera gurez ku-ba-ku

KHun-e-junun to jal gaya shauq kidhar nikal gaya

sust hain dil ki dhaDkanen tez hai nabz-e-arzu

tera mera qusur kya ye to hai jabr-e-irtiqa

bas wo jo rabt ho gaya aap hi pa gaya numu

main jo raha hun be-suKHan ye bhi hai ehtiram-e-fan

yani mujhe aziz thi apni ghazal ki aabru